Gramática - Academia de la Llingua Asturiana

Como axetivos antepuestos, los masculinos singulares dalgún y nengún
son les úniques formes posibles: dalgún llobu, nengún picu.
N'allugamientu pospuestu o nuclear presenten doble forma, dalgún o dalgunu,
nengún o nengunu; exemplos: nun vieron llobu dalgún ~ llobu dalgunu,
vieron dalgún ~ dalgunu, nun xubieron picu nengún ~ picu nengunu.
Compórtase de manera asemeyada un, qu'amuesa nel masculín singular
solamente esta forma como axetivu antepuestu: un llobu, emplegando
indistintamente les formes ún o unu cuando ye sustantivu (nun confundir
esta última forma col neutru uno): falemos con ún ~ unu que te conocía,
ún ~ unu nun sabe qué facer neses ocasiones. Pela so parte, el masculín
singular dalu (nun atopa camín dalu) cueye la forma dal n'allugamientu
antepuestu (nun atopa dal camín).
Cualquiera presenta tamién la forma cualesquiera: un día cualquiera o un
día cualesquiera. Pierde la vocal final cuando precede al sustantivu: cualquier
día o cualesquier día. Pela so parte, dalguién y dalgo almiten tamién
les variantes alguién y algo.
No que se refier al significáu, puen constatase delles equivalencies:
dalgún dalguna equival a daqué
dalgunos dalgunes equival a dellos delles
nengún nenguna equival a dalu dala
daquién equival a dalguién
daqué equival a dalgo o a dello
Exemplos: mercó dalguna cosa interesante o mercó daqué cosa interesante,
dalgunes diputaes protestaron o delles diputaes protestaron, nun
hai motivu nengún o nun hai motivu dalu, ¿hai daquién per ende? o ¿hai
dalguién per ende?, si tienes sal dame daqué o si tienes sal dame dalgo o
si tienes sal dame dello.
Pela so parte, l'indefiníu un una uno tien un significáu estremáu del del
numberal un una. Ésti opónse a los otros numberales (una casa / dos
cases, tres cases...), mentanto que l'indefiníu opónse a otros esistenciales
(una casa / dalguna casa, la mesma casa, otra casa...). Amás, pol so significáu,
el numberal nun tien plural, a la escontra del indefiníu, que sí lu
tien (unes cases).
De los indefiníos esistenciales, unos refiérense namái a persones (daquién,
dalguién, naide, quienquiera), otros namái a coses (dalgo, nada), mentanto
que'l restu ye a aludir lo mesmo a persones qu'a coses.
XI.
Los indefiníos
121