Gramática - Academia de la Llingua Asturiana

XI.
Los indefiníos
120
3
Indefiníos esistenciales
3.1 Conteníu y formes
Los indefiníos esistenciales faen una referencia a la esistencia imprecisa
(o a la inesistencia) de coses o persones. Son los que s'amuesen darréu:
ún ~ unu un una uno, unos unes
dalgún ~ dalgunu dalguna dalguno, dalgunos dalgunes
dél della dello, dellos delles
nengún ~ nengunu nenguna nenguno, nengunos nengunes
daquién
dalguién
dalgo
daqué
naide
nada
dalu ~ dal dala dalo, dalos dales
cualquiera ~ cualesquiera o cualquier ~ cualesquier
quienquiera
cada
A efeutos ortográficos, enxamás se confundirán les formes dél della dello
dellos delles coles secuencies de preposición de + pronome personal: d'él,
d'ella, d'ello, d'ellos, d'elles. Exemplos: los llibros yeren dellos "dalgunos";
los llibros yeren d'ellos "suyos"; idees, salieron delles "dalgunes";
les idees, salieron d'elles "salieron de les muyeres". De la mesma manera,
nun habrá confundise l'indefiníu dél (tónicu, con acentu) con del (átonu,
ensin acentu), contraición de preposición de + artículu el; exemplos: facíanos
falta dél carbón "dalgo de carbón", les manches yeren del carbón
"pertenecientes al carbón". Pela so parte, la xuntura de cada y un una uno
da llugar a les contraiciones caún caúna caúno.
Como axetivu o como pronome, l'indefiníu un una uno, siempre que va
precedíu de la preposición en, forma con ella les contraiciones nun ~ nún,
nunu nuna nuno, nunos nunes. Exemplos: vive nun pueblu perguapu,
¿candidatos? taba pensando nún, ¿café? enfotóse nuno mui rico, nunos
años téngolo acabao, travesaron el ríu nunes barques. Pero la contraición
nun se fai con otres preposiciones: ye d'un pueblu perguapu, la propuesta
d'ún, el preciu d'uno mui rico, nel plazu d'unos años, el pasu d'unes barques.