Gramática - Academia de la Llingua Asturiana

finíos establecen una comparanza, que pue ser d'igualdá (tien tantos fíos
como l'hermanu), de superioridá (dixo más coses que nós) o d'inferioridá
(trabayó menos años que'l cuñáu). Davezu, estos indefiníos faen referencia
a la situación o al contestu: tien tantos fíos, dixo más coses, trabayó
menos años.
Na so condición d'axetivos, estos indefiníos puen alverbializase (ver
XXIII.3.7.3). Exemplos: falen tanto qu'amorien, emburria más la puerta,
ye más altu, emporcái menos el suelu, paecen menos blancos. L'indefiníu
alverbializáu tanto conviértese en tan cuando se subordina a un axetivu o
alverbiu: ye tan altu como tu, ta tan lloñe que nun s'acolumbra.
Un usu particular amuésalu tantu -a -o, que pue emplegase como sustitutu
imprecisu d'un numberal cardinal. Exemplos: les llenteyes cuesten tantes
pesetes, les que seyan; Uviéu, a tantos de tantos de mil novecientos
tantos; llegó a casa a les tantes de la nueche; Lluis tien cuarenta años y
la muyer otros tantos; comió fabes, tortiella y arroz con lleche, y la muyer
otro tanto.
Lo mesmo que los cuantificadores absolutos, los comparativos almiten
tamién —alternando col usu axetivu— la construcción partitiva, que consiste
nuna sustantivación qu'establez concordancia (cuando ye posible)
con un sustantivu subordináu; ver XXII.2.12. Exemplos: tomen tantu
café... o tomen tanto de café..., dixeron tantes fataes o dixeron tantes de
fataes, córtame más quesu o córtame más de quesu, traxo menos azucre o
traxo menos d'azucre.
2.2.2 CARAUTERÍSTIQUES GRAMATICALES
De los cuantificares relativos, tantu -a -o ofrez variaciones de xéneru y
númberu: tantu pan, tanta fariña, tanto que nos quitó, tantes escueles, tantos
llibros. Pel so llau, más y menos son invariables na so forma: más pan,
menos fariña, más que nos quitó, menos escueles, más llibros.
Seya como axetivos o como sustantivos, cuando entren en concordancia o
referencia a sustantivos non cuntables, empléguense en singular: nun
bebas tanta sidra ’ nun bebas tanto, merca más tela ’ merca más, vieno
menos xente ’ vieno menos.
En concordancia o referencia a un cuntable, úsense davezu en plural: nun
comas tantes fabes ’ nun comas tantes, has a facer más furacos nesti chaplón
’ has a facer más, nesi monte queden menos fayes ’ nesi monte queden
menos.
XI.
Los indefiníos
119