Gramática - Academia de la Llingua Asturiana

Morfoloxía
10
La Gramática de la Llingua Asturiana foi fecha naguando por
amestar lo que ye’l rigor científicu más esixente con una redacción acordies
col nivel mediu de comprensión de lo que se camienta que sedrán los
sos llectores. Fuxóse, arrémente, d’una terminoloxía enguedeyada y academicista
afayándose, siempre que foi posible, con aquello que resulta
más averao a les nueses tradiciones gramaticales y allumando con bayura
d’exemplos los conceutos más tapecíos. El resultáu ye un testu claru y
concisu anque, como toa ellaboración intelectual, la so llectura esixa
daqué esfuerzu razonable.
A lo llargo venticinco capítulos va afilvanándose la descripción
llingüística, xebrándose, adulces, lo que se prescibe de lo que ye, cenciellamente,
potestativo o de llibre elección nel usu normal de la llingua nos
niveles cultos. Fíxose lo posible por algamar la totalidá d’estructures y por
asitiar nel llugar atopadizu lo que correspuende a les diferentes situaciones
y posibilidaes d’un bon falante. Pero, por más que s’olive por ello, persábese
que l’ideal pol que se nagua cuasimente nunca se llogra y que
namás ediciones futures perfadrán lo qu’agora nun tea perfecho. En tou
casu, el material que s’ufierta ye tanto y les informaciones daes de tal calter
que podría xulgase, ensin prexuiciu, que’l llector, l’escritor y l’estudiosu
d’esti idioma tienen agora nes manes un modelu llingüísticu bien
trabáu, meyor iguáu y nes condiciones más afayadices p’alcontrar nél el
rendimientu más prestosu.
De lo que vien diciéndose deduzse, a les clares, que lo que güei
se da a la lluz ye una gramática normativa del idioma asturianu y non una
dialectoloxía del so dominiu llingüísticu. Pero d’ello nun se sigue que l’asoleyamientu
d’esti testu tenga que s’entender como la sentencia que
sapoza’l futuru de los dialeutos de la llingua. N’efeutu, esta gramática non
sólo nun condena los usos orales de les variantes sinón qu’aguiya a calteneles
na fala y na enseñanza al mesmu tiempu que prevé nueves soluciones
gráfiques. Esta gramática non sólo nun va a la escontra de la escritura
dialectal sinón que, acordies cola práutica de les publicaciones académiques,
aconseya y afala l’usu escritu nos que s’afayen con ello. El sentíu
d’una gramática normativa ye ufiertar un códigu, un estándar, bien llaboráu
col que s’alloñe l’arbitrariedá y se favoreza’l bon entendimientu na
vida d’una comunidá llingüística; poro, nun pue ser el so oxetivu desaniciar
los usos llocales y familiares colos que meyor s’identiquen los falantes,
verdaderos protagonistes del puxu idiomáticu, del bon falar y de la so
xusta anovación. Pa facer esta gramática, los sos redactores tuvieron peratentos
a tola realidá llingüística asturiana, a la gueta siempre del testu más