EYMSC Håndbok samisk

Doaibmaevttohusat 1. oassái – Iešbirgengálggat
Nuoladeapmi ja gárvodeapmi
• Sáhttá leat vuogas jus livččii bivttaskássa mánáidgárddis, mas leat boares báiddit, jáhkat
main leat boalut ja johtinlohkat 1 , t-báiddit, čuvllat, buvssat ja vuolpput. Sáhttet áinnas
leat stuora biktasat – de lea mánáide álkit ieža máhttit daid nuollat ja coggat.
• Geavahit biktasiid stoahkamiin; rollastohkosiid main molsot biktasiid, stoahkat
dollačáskkadeaddji, coggat biktasiid guhtet guimmiidasaset. Nuolahit ja gárvvohit
dohkáid ja guovžžažiid.
• Jus johtinlohkas lea gitta čoavddariekkis dahje earálágan riekkis, de sáhttá álkibut
nagodit gaikut olgobiktasa johtinlohka gitta.
• Doaimmat main mánná doallá diŋgga gieđas, ja geavaha seamma gieđa; omd. stoahká
jorbadasaiguin 2 , bordá ruđaid seastinlihttái.
Boradeapmi
• Mánáid boradanreaiddut/gohput. Bija juoidá dállearkka vuollái nu ahte dat ii jođaš, jus
mánná ii nagot dan doallat jaska.
• Čohkkát dássedit ja vuohkkasit, buorre doarjja čielgái ja juolgevuođuide.
• Stoahkat duhkoras boradanlihtiiguin, basttiin ja gáffaliin; addit borrat dohkáide/
guovžžažiidda, ieža boradit.
• Searvat biepmu lágideapmái, bidjat beavdái ja čorget eret beavddis.
• Doaimmat main adnojit goappašat gieđat; omd. njuvdit láibevajahasa niibbiin, botnjat
luovos ja čavget lohki, čuohppat banána, agurkka ja eará diekkáriid.
Doaibmaevttohusat 2. oassái – Fiinnamotorihkalaš gálggat
Doallat bliántta
• Stivrejeaddji giehta lea dábálaččat ovdánan go mánná lea gaskal 3- 5 jagi. Go bures leat
hárjánan, de máhttet dien agi mánát dábálaččat doallat bliántta lotkadit ja ulbmillaččat
dađistaga.
• Láže dili nu ahte sáhttet lonohallat doaimmaid; tennjet, ivdnet, kopieret hámiid, sárgut
sárgáid dahje čuoggáid mielde.
• Tennjet távvalii/seaidnái (ceakko diŋgii) ja geavat áinnas oanehis tennjenreaidduid
danin go de láddá jođáneappot rievttes bliánttadoallan vuohki.
1
Johtinlohka = glidelås
2
Jorbadas = klinkekule
48