GOSSIP GAZETTE MAGAZINE - JANUARY 2022 - ISSUE 1

Arnold gesels..
Hallo!
As jy hier lees is ons hopelik in 2022!
Daarom dat ek kan sê: “Voorspoedige en geseënde 2022!” Mag die jaar vir jou uitblom in heerlikheid.
Terwyl ek predikant was in Steynsrus en dit was tot Mei 2021, het ek elke Sondag ‘n kindermoment in die kerk
gehad, genoem na die bekende Jogurt en geskenkie – eiers, KInderjoy! Die bedoeling was dat die oomblik lekker
en verrrassend vir die kinders moes wees. Aan die einde van die diens kon die kinders altyd ‘n lekker uit ‘n kissie
voor in die kerk kom haal – so ‘n bederfie!
Hoekom praat ek hieroor? Eintlik wil ek oor die lekkers praat. By die U-Save in Steynsrus het ek elke Saterdag ‘n
sak gemengde sjokolade gaan koop – elke sjokolade getooi in sy mooi kleertjies van geel, groen, rooi, pers ens.
Die kinders kon uitsoek en as daar oorgebly het, het die kerkraad die res geneem om soet in die konsistorie op te
eet. Dus moes daar altyd toesig wees.
Maar nou, soos die tyd aangeloop het en besigheids mense skelmer geword het, het die sjokolade sakkie nie meer
net bestaan uit sjokolade nie, maar ook sommer met ‘n klompie toffies tussen die sjokolade. Afhangende van die
toestand van die wisseltande of ou tande kon dit maar taai wees.
‘n Lang storie om te sê dat ons jaar wat voorlê ook soos die sak sjokolade kan wees: dit kan opwindend,
veelkleurig, verassend wees en ons kan uitsien na elke geleentheid wat hom ontvou, want ek weet nie hoe dit sal
wees nie, maar ons kan sê: “Carpé Diem!” “Gryp die dag!” of soos Psalm 118:24 sê: “Dit is die dag wat die Here
gemaak het; laat ons daaroor juig en bly wees!”
Aan die anderkant is dit moontlik dat dit kan voel of ek elke keer die toffie kry en al die ander met die lekker
lekkergoed wegloop (soos Turkish delight in sjokolade..). Dan sê ons: “Ja, dis net my luck! Kyk hoe goed gaan dit
met ander, hulle floreer, het werk, geleenthede, maar ek bly sukkel, kry die agterkant van die lewe!” Dan vra ons of
ons altyd agter in die ry staan. Maar natuurlik is toffies ook lekkergoed, dit hou langer en maak sommer my kake
baie sterk. Uitdagings maak ons meer weerbare en afhanklike mense, mense wat in alles dankbaar is en aan God
vasklou en in hierdie proses die avontuur van die lewe ervaar.
Die vreemde van ‘n nuwe jaar is dat ons sekere “lekkers” van die vorige jaar ook oordra. Alles is nie op die oujaar
kan en klaar afgehandel nie. Ons dra baie van ons uitdagings oor na die nuwe lewensjaar. Sekere uitdagings of
probleme word dalk van jaar tot jaar oorgedra omdat ons sukkel om die toffies te bêre. Ons handel nie ons goed
van gister af nie. Ons hou die kwaad en onvergewensgesindheid binne ons. Ons stel uit om aan ons drome en
verhoudings te werk.
My raad is: kom ons maak die pakkie leeg sover ons kan, toffies en al.