Hakha NLD thimfung kawl ning ka hnak a ka doh mi tlawmpal cheuh ve nak

Hakha NLD thimfung kawl ning ka hnak a ka doh mi tlawmpal cheuh ve nak:
Pu Khua Hram fb in lak mi a si.
NLD nih Bungzung khua i an chimmi bia roling
5/10/2020 ni cu NLD party in Pu SuiThio."Pu TialLing le Pu NgunVung hna cu meesuai
dingah an ra i Bungzung khua i pekdingmi taihne sizung cu nan uar tukmi Chin party U
SiangMang Fapa nih Lamtuk khua ah a thialmi a si tiah pu sui thio nih zapi sin ah a chim.
Khua upa leiin hihi biahman a si le silo hlathlai kan duh ve caah hram ngeite in nan kan
chim kho hnga maw tiah bia kan hal hna.
Cu tikah Lamtuk khua cu 2015 thimnak lio ah Chin party nih teinak an hmuhnak hmun a
si caah hman dawh a si ko an ti than.Ziah milai upa pipi nih"dawh a si ko"timi bia/
nanmah nan ruahnak menmen cu nan kan chimh ee hiruangah Party dang hnorsuan
zong a si i Bungzung mipi kan lunghrawh /donghter pei nan kan timh hi cu long si hlah
Lamtuk le bungzung 'cun mah nih hin senthang peng le zokhua peng rual rem nak a hnur
suang kho mi thll ah a cang kho tiah zapi cu thin i domh in kan um ko .mah kong he peh
tlai in bungzung khua boi pu chanhre nih cun a hlan deuh tein bia chohvai arak um cang
lio ah cunglei kan cozah nih atha an ti nak hmun ah chiah ko hna seh kan mah khua
theng nih co uh sih ti lungput hi khrihfa lungput asi lo. kan nih bz cu hmai lei ah tehne
sizung cu chimh lo pyithuh sizung hmanh kan hmuh te ko lai tiah a kan tipeng nain mah
bia hi chimh than asi caah pengkhat le peng khat khua khat le khua khat rual rem lo nak
a hnur sual kho mi bia asi caah chimh ti lo ah atha lai tiah ruah nak he.ka langh ter mi asi.
Pu Khua Hram nih attial mi hi a hman mi a si le si lo theih duh ah ka u Hrangtar ka chawnh. A hman
mi a si ko a ti. Hakha Meesandahnay 2 nk. In a cuh ding mi NLD pawl le Aungnaingzi lutlai pawl an itel
dih a ti. Bungzung khua nu/pa cung, Hakha NLD nih an hmuh ning hna ka ruah tik ah, ka lung a nuam
lo tuk. Khua Nu/Pa zawng an lung atthah lo caah hi ``RoLing`` ti mi biafang hi an hman tiah ka ruah.
Bungzung khau hi kan mah Khuapi khua nih tlak mi khua a si. Cu caah ka hnakkar ah a tenh peng.
Keimah pumpak in tuah piak khawh mi ka ngei lo na in khua thawngpang cu ka um nak hmun in ka
hal peng tawn hna.
Hakha NLD an chim mi bia zoh tik ah…
1. Zei an theimi a um lo caah kan duh poh in kan hlen khawh hna lai.
2. An mah (Hakha NLD) teinak hmuh duh ah mithang an chiat.
3. Theih huaham ttuang lo in ruahdombia an chim.
4. NLD Party policy he akalh in thimfung an kawl.
1. Zei an theimi a um lo caah kan duh poh in kan hlen khawh hna lai.
Hakha NLD pawl zangfaknak in khaute um mi khua nu/pa zeirel lo hi hmang hrimhrim hlah uh! A tu
chan cu IT chan a si cang hi nan theih ko cu ta. Senthang Peng khuate hna cu zei an theih mi a um lo ti
in nautak hmang hlah uh! Hleng hna hlah uh!
2. An mah (Hakha NLD) teinak hmuh duh ah mithang an chiat.
Mi tthahlonak chim le thangchiat cu minung sinak ii a niam bik dir hmun a si. MP a cuh ve ding mi nih
hi tluk tal cu zatlang nun ning nan thei lo ma? A hman lo mi thil pi kha mah ruahnak in chim le

mithang chiat chap chap hi cu lungput apicel lo tuk mi dirhmun a si. Ningzak bak nan si ko. Achimtupa
nih achim mi kha zeihmanh al nak le remh piak nak Hakha NLD ahawi le Aungnaingzi ahawi le nih an
ngei lo. Cu caah Hakha NLD cung ah sual phawt nan si.
3. Theih huaham ttuang lo in ruahdom bia an chim.
Mipi caah rian ttuan itimh in mah ttuan ding mi rian hmah ttha tthi in theih lo, cun duh poh in bia
chim le thimfung kawl hi cu, nan mah le nan mah nan ihlen zawng a si ii mipi nan hlen hna zawng a
si. Chim ding bia dang nan ngei lo ma? NLD nih 2020 thimnak caah atimh mi nan thei lo ma?
Daw Aungsan Suhgyi le apa Bochoh Aungsan kong ttha te in nan thei lo ma? An mah pafa ii ram le
miphun an dawt ning hmanh kha chim ding atam tuk ko cu ta! Cu hmanh cu nan thei lo ma?
Thimfung nan kawl ii zei le zei dek nan chim. Ka lung nan rawk ko.
Khua khat le khua khat iremlonak, itheihthiamlonak le ihnahchuahnak nan chuahter. Cu hlawng si lo
in Peng tlang tleidannak zawng atha nan tthawn ter hi nan thei ma? Ramkel attuan mi nih a tu
bantuk thimnak caan ah bia ka khat chim sual ah cun loh bak a si nan thei rih rau lo ti…
4. NLD Party policy he akalh in thimfung an kawl.
Daw Aungsan Suhgyi nih ``thimfung kawl tik ah nan pek khawh hna lo ding mi kha kan in pek hna lai
tiah va ti hna hlah uh! Thimfung na kan pek ah cun Lam, Hlei, Sianginn, Siizung tbt. kan in pek hna lai
tiah ti hna hlah uh`` ti in pei a ti kha. A rung cu: hi bai nan chim ah cun lat ei (Eihmuar lak) he a khat ti
in pei a ti kha. Cu hlei ah hi hna pawl cu Acozah nih ttuan ding rian a si kha nan theih ko cu ta! A zei
Acozah an kai poh ah an ttuan ding a si ko. Asinain mipi thim mi Acozah nih hi rian hna attuan tik ah
ram le miphun dawtnak thin lung he ttuan in Lam ca, Sianginn ca ti mi tangka vial te kha ttha te in le
felte in hman ding, ttuan ding pei a si ko cu. NLD policy ning in attuan mi MP pawl cu an mipi nih
ttuan ti lo ding hmanh an ttih si. Nan nih Hakha NLD hi cu nan luan pah ko rua! Kum 5. Chung nan
rian ttuan mi chung in mipi ca si lo nan mah le chungkhar ca deuh ah a si rua. Mah le chungkhar ca
hlawng nan ruah a si ah cun cawlet, cawhlor tuah ko heh uh!
Hi ban tuk in Party policy lo in thimfung nan kawl mi nih Party min le Daw Aungsan Suhgyi min nan
chiat ter. Hakha ii Meesandatnay 2.nk ah teinak nan hmuh lo a si ah cun mipi mawt chiat te hna hlah
uh! Nan mah le nan mah kha thlalang ah ttha te in izoh te uh law nan chim mi bia kha thlalang hmai
ah chim tthan te hmanh uh.
Thimnak I thimfung kawl tik ah a zei Party poh nih nan tuah mi policy tu kha biapi deuh in chim rel
ding a si. Angaite ti ah cun MP cu mipi aiawhtu nan si. Nan mipi caah rian nan ttuan lo mi, mipi nih an
itheihthiam mi hna hmanh hi nan ilawmhtuk ding a si. A tu cu alet ta lam in Acozah a dirh kho mi MP
hna cu mipi kha nan bawi piak ngai hna. Bawi ah nan I ruah. Nan thil ti khawhnak mipi kut cung um
nan thei lo ma? Cu caah khua ruat bu te in bia chim uh law attha lai.
Hi ka ttial mi ca cung ah attial tu keimah nih 100 ah 100 in ka dirpi. Biahalnak, rauhnakcheuh le
adangdang kong chimrel aduh mi nih chimrel khawh a si.
Biak Hmun Thang (Khuapi hrinsor)