You also want an ePaper? Increase the reach of your titles
YUMPU automatically turns print PDFs into web optimized ePapers that Google loves.
NÁTTÚRUFRÆÐISTOFNUN ÍSLANDS 2008<br />
Verndun svæða, vistgerða og tegunda. Tillögur Náttúrufræðistofnunar Íslands<br />
vegna náttúruverndaráætlunar 2009–2013<br />
Látraströnd – Náttfaravíkur<br />
Svæðið sem hér er lagt til að verði verndað er um 609 km² að stærð og tilheyrir<br />
sveitarfélögunum Grýtubakkahreppi og Þingeyjarsveit. Svæðið er á náttúruminjaskrá (svæði<br />
512) fyrir fjölbreytilegt landslag og ríkulegan gróður og fyrir útivistargildi þess og það er<br />
einnig á náttúruverndaráætlun 2004–2008.<br />
Markmið friðlýsingarinnar: Að vernda búsvæði fjöldamargra sjaldgæfra plöntutegunda.<br />
Svæðið býr yfir afar sérstæðu og óvenju fjölskrúðugu gróðurfari, sem hefur verið vel<br />
rannsakað og það hefur því allnokkuð vísindalegt gildi. Með því að tryggja búsvæðavernd<br />
tegundanna er stuðlað að viðhaldi líffræðilegrar fjölbreytni, sbr. 2010 markmið Sameinuðu<br />
þjóðanna um líffræðilega fjölbreytni og evrópsku áætlunina um plöntuvernd 2008–2014.<br />
Mörk: Frá sjó við Hjalla norðan Grenivíkur, í Grenivíkurfjall og beint austur í Þjófadal. Um<br />
Grjótskálarhnjúk suður í Skessuhrygg og þaðan í austur í Austurfjall og þá norðaustur í<br />
Skessuskálarfjall og til sjávar í Hellisvík.<br />
Svæðislýsing: Mjög fjölbreytilegt landslag með fjalllendi, láglendi og strandsvæðum.<br />
Nokkrar eyðijarðir eru á Látraströnd, í Fjörðum og á Flateyjardal. Kjörið útivistarsvæði til<br />
gönguferða og náttúruskoðunar. Fjölbreytt búsvæði með ríkulegum gróðri, svo sem gras- og<br />
votlendi við sjó og upp í fjallseggjar í meira en 1.000 m hæð. Þarna er sérstætt og óvenju<br />
fjölbreytt gróðurfar og margar sjaldgæfar og fremur sjaldgæfar háplöntutegundir. Gömul<br />
megineldstöð er á svæðinu með rhýólítmyndunum og tilheyrandi jarðhitaummyndun. Við<br />
ströndina norðaustan til gætir áhrifa frá Húsavíkur – Flateyjar-þverbrotabeltinu. Fornminjar<br />
og eyðijarðir tengdar sögnum.<br />
Núverandi landnotkun: Beit, útivist og ferðaþjónusta.<br />
Ógnir: Engar alvarlegar.<br />
Nauðsynlegar aðgerðir: Ekkert er því til fyrirstöðu að beit búfénaðar verði áfram í svipaðri<br />
mynd og nú er. Koma þarf í veg fyrir að ágengar, framandi plöntutegundir verði fluttar inn á<br />
svæðið og forðast ber rask á landinu á þeim stöðum sem eru mikilvægastir fyrir<br />
plöntutegundirnar sem hér eru til umfjöllunar.<br />
Forsendur friðlýsingar: Svæðið hefur mikið verndargildi sakir sérstæðs og óvenju<br />
fjölbreytts gróðurfars. Það hefur allnokkuð vísindalegt gildi þar sem gróðurfar þess hefur<br />
verið vel rannsakað. Óvenju margar sjaldgæfar tegundir finnast á svæðinu eins og<br />
fjallalójurt, Antennaria alpina, þúsundblaðarós, Athyrium distentifolium, skollakambur,<br />
Blechnum spicant, lensutungljurt, Botrychium lanceolatum, mánajurt, Botrychium boreale,<br />
fjallabláklukka, Campanula uniflora, línstör, Carex brunnescens, fölvastör, Carex livida,<br />
kollstör, Carex macloviana, finnungsstör, Carex nardina, dúnhulstrastör, Carex pilulifera,<br />
keldustör, Carex paupercula, skollaber, Cornus suecica, hjartafífill, Crepis paludosa,<br />
fjallabrúða, Diapensia lapponica, sóldögg, Drosera rotundifolia, þrenningarmaðra, Galium<br />
trifidum, álftalaukur, Isoëtes echinospora, eggtvíblaðka, Listera ovata, grájurt, Omalotheca<br />
sylvatica, mýraberjalyng, Oxycoccus microcarpus, bláklukkulyng, Phyllodoce coerulea,<br />
bjöllulilja, Pyrola grandiflora, sifjarsóley, Ranunculus auricomus, blöðrujurt, Utricularia<br />
minor og skógfjóla, Viola rivinana.<br />
Tegund Tegundarheiti Flokkur Algengi Válisti Forsendur verndar<br />
Trjónustör Carex flava Háplanta Sjaldgæf EN Fimm af sex fundarstöðum<br />
Fjallkrækill Sagina caespitosa Háplanta Sjaldgæf VU Tveir af >5 fundarstöðum<br />
41