You also want an ePaper? Increase the reach of your titles
YUMPU automatically turns print PDFs into web optimized ePapers that Google loves.
NÁTTÚRUFRÆÐISTOFNUN ÍSLANDS 2008<br />
Verndun svæða, vistgerða og tegunda. Tillögur Náttúrufræðistofnunar Íslands<br />
vegna náttúruverndaráætlunar 2009–2013<br />
Evrópusambandsins byggir á tveimur meginstoðum, þ.e. tilskipunum þess um verndun<br />
náttúrulegra vistgerða og villtra plöntu- og dýrategunda (Council Directive on the<br />
conservation of natural habitats and of wild fauna and flora 1992) og verndun villtra fugla<br />
(Council Directive on the conservation of wild birds 1979). Í tilskipununum eru listaðar upp<br />
vistgerðir og lífverutegundir í Evrópu sem ber að vernda og miða skal að því að velja<br />
landsvæði sem tryggja verndun þeirra til framtíðar. Svæðin eru grunnur að vernd og viðgangi<br />
þessara tilteknu vistgerða og lífverutegunda og þannig er t.d. ákveðinni fuglategund tryggður<br />
aðgangur að varpsvæðum sínum á einum stað en einnig fæðusvæðum á farleiðum eða<br />
uppeldisstöðum annars staðar.<br />
Þessi leið Evrópusambandsins, náttúruverndaráætlunin Natura 2000, þótti gefast það vel að<br />
önnur aðildarríki Bernarsamningsins samþykktu árið 1998 að útfæra hana þannig að hún<br />
næði til allrar Evrópu og myndaði heildstætt net verndarsvæða í álfunni, nefnt Emerald<br />
network. Náttúruverndaráætlun Evrópusambandsins er hluti af Emerald, en hefur þá sérstöðu<br />
að aðildarríki sambandsins eru lagalega skylduð til að framkvæma hana með fullnægjandi<br />
hætti á meðan önnur ríki hafa frjálsari hendur um aðild að Emerald. Hafa ber í huga að með<br />
því að vinna samkvæmt þessari aðferðafræði fullnægja löndin um leið sameiginlegum<br />
skuldbindingum varðandi Ríósamninginn um líffræðilega fjölbreytni.<br />
Hér á landi hafa ekki enn verið tilnefnd fyrstu Emeraldsvæðin en á Náttúrufræðistofnun<br />
Íslands er hafinn undirbúningur að því að vinna fyrstu tillögurnar. Stofnunin telur eðlilegt að<br />
sú vinna tengist vinnu við náttúruverndaráætlun enda hugmynda- og aðferðafræðin sú sama í<br />
báðum tilfellum.<br />
4.2.2 Ramsarsvæði<br />
Ramsarsamningurinn er fyrsti alþjóðasamningur sinnar tegundar sem fjallar um vernd og<br />
nýtingu ákveðinna búsvæða eða vistkerfa. Eitt af skilyrðum samningsins er að aðildarríki<br />
tilnefni og verndi votlendi sem hafa alþjóðlegt mikilvægi og eru svæðin valin eftir ákveðnum<br />
viðmiðum. Þegar metið er hvort svæðin eru alþjóðlega mikilvæg er m.a. skoðað hvort<br />
votlendið sé sjaldgæft eða einkennandi fyrir tiltekið landsvæði og hvort það er mikilvægt<br />
fyrir sjaldgæfar eða mikilvægar lífverutegundir. Þá þarf votlendið að vera búsvæði fyrir<br />
minnst 20 þúsund votlendisfugla eða búsvæði fyrir meira en 1% af ákveðnum fuglastofni en<br />
það samræmist raunar viðmiðum alþjóða fuglaverndarsamtakanna BirdLife International<br />
fyrir alþjóðlega mikilvæg fuglasvæði.<br />
Aðildarríki Ramsarsamningsins skuldbinda sig til að vernda votlendi, til dæmis með því að<br />
vernda eða friðlýsa ákveðin svæði, nýta votlendi á skynsamlegan og sjálfbæran hátt og stuðla<br />
að betri lífsskilyrðum fyrir votlendisfugla. Á Íslandi hafa verið tilnefnd þrjú Ramsarsvæði en<br />
þau eru Mývatn og Laxá, Þjórsárver og Grunnafjörður og eru þau öll friðlýst. Til<br />
samanburðar má nefna að Norðurlandaþjóðirnar hafa til samans tilnefnt 188 svæði á<br />
Ramsarlistann.<br />
Tímabært er að tilnefnd verði fleiri Ramsarsvæði af Íslands hálfu og hefur umhverfisráðherra<br />
þegar lýst yfir áhuga á því að þrjú ný svæði verði tekin inn á skrá Ramsarsamningsins um<br />
vernd votlendissvæða. Þessi nýju Ramsarsvæði eru: Breiðafjörður, Guðlaugs- og<br />
Álfgeirstungur á Eyvindarstaðaheiði norðvestan Hofsjökuls og Eyjabakkar norðan<br />
Vatnajökuls. Náttúrufræðistofnun Íslands telur að undirbúningur þessa ætti vel heima í<br />
tengslum við náttúruverndaráætlun.<br />
25