1 hotuba ya waziri mkuu, mheshimiwa mizengo peter pinda (mb)

Check Against Delivery
hayo ni ajali mbaya ya Jahazi la Sunrise iliyotokea Wangwi katika Bahari ya Hindi mwezi
Januari 2013 na ajali mbalimbali za vyombo vingine vya usafiri ambapo watu walipoteza maisha
na wengine kupata majeraha. Hivi karibuni pia tumeshuhudia ajali mbaya ya kuporomoka kwa
jengo la ghorofa 16 Jijini Dar es Salaam ambalo limesababisha vifo vya watu 34 na tukio
linguine ni vifo 13 vilivyotokana na kufukiwa na kifusi cha ‘moram’ katika machimbo ya
Mushono Jijini Arusha. Aidha, tumempoteza ghafla Mbunge mwenzetu, Mheshimiwa Salim
Hemed Khamis, Mbunge wa Chambani na baadhi yetu tumepoteza Ndugu, wakiwemo wazazi
na watoto kutokana na sababu mbalimbali. Wote nawapa Pole Sana!
Mzunguko Mpya wa Bajeti
6. Mheshimiwa Spika, kuanzia mwaka wa fedha 2013/2014, tumekubaliana kuanza
Mzunguko Mpya wa Bajeti ambao utatuwezesha kukamilisha mjadala wa Bajeti ya Serikali
mapema. Lengo ni kwamba ifikapo tarehe 30 Juni ya kila mwaka, taratibu zote za kuandaa,
kuchambua na kupitisha Bajeti ya Serikali ziwe zimekamilika na utekelezaji wa Bajeti kuanza
ifikapo tarehe 1 Julai. Tofauti na miaka ya nyuma ambapo Bajeti ya Serikali ilikuwa ikijadiliwa
na kupitishwa kwanza na kufuatiwa na Bajeti za Kisekta, sasa makadirio na matumizi ya Wizara
yatajadilwa kwanza na hatimaye kuhitimishwa na majadiliano ya kina ya Bajeti ya Serikali. Moja
ya faida kubwa ya utaratibu huu mpya ni kwamba, mwaka mpya wa fedha unapoanza
utekelezaji wa kazi za Serikali unaanza mara moja. Utaratibu huo utawawezesha Waheshimiwa
Mawaziri na Wabunge pamoja na Watendaji wa Serikali kurejea katika kazi zao na kusimamia
kikamilifu utekelezaji wa Bajeti na Mpango wa Maendeleo. Kwa kuwa tunaanza kwa mara ya
kwanza kutumia utaratibu huo hazitakosekana dosari chache ambazo zitafanyiwa kazi kadri
tunavyoendelea kuutumia.
Nawaomba Waheshimiwa Wabunge kutumia fursa hii kutoa maoni na ushauri utakaosaidia
kuboresha Bajeti ya Serikali ili iwe bora zaidi na yenye maslahi makubwa kwa wananchi wetu.
7. Mheshimiwa Spika, maandalizi ya Bajeti yamezingatia Ilani ya Uchaguzi ya Chama Cha
Mapinduzi ya mwaka 2010; Mpango wa Kwanza wa Maendeleo wa Miaka Mitano; Malengo ya
Maendeleo ya Milenia na Awamu ya Pili ya Mkakati wa Kukuza Uchumi na Kupunguza
Umaskini. Katika mwaka 2013/2014, Serikali itaendelea kuimarisha usimamizi wa rasilimali
chache tulizonazo ili kutekeleza Miradi ya Maendeleo ya Kipaumbele ambayo itachochea ukuaji
wa haraka wa uchumi.
8. Mheshimiwa Spika, nachukua fursa hii kumpongeza sana Mdhibiti na Mkaguzi Mkuu wa
Hesabu za Serikali, Bwana Ludovick Utouh, pamoja na wafanyakazi wote wa Ofisi ya Taifa ya
Ukaguzi kwa kazi nzuri wanayoifanya ya kusimamia rasilimali za Serikali. Matunda ya kazi hii
yameonekana hadi nje ya Nchi na ndiyo maana Ofisi hii sasa imepandishwa hadhi kutoka
Daraja la Kwanza hadi la Tatu kwa vigezo vinavyotumiwa na Muungano wa Ofisi za Ukaguzi wa
Hesabu za Serikali katika Bara la Afrika kwa Nchi zinazotumia Lugha ya Kiingereza.
HALI YA SIASA
9. Mheshimiwa Spika, Nchi yetu imepiga hatua ya kuridhisha katika kuimarisha
Demokrasia ya Vyama vingi. Kwa ujumla hali ya kisiasa Nchini ni tulivu na Vyama vya Siasa
vinaendelea kutekeleza majukumu yake. Idadi ya Vyama vya Siasa vyenye usajili wa kudumu
imefikia 20 baada ya Chama cha Alliance for Democratic Change (ADC) kupata usajili wa
kudumu. Chama cha Ukombozi wa Umma (CHAUMA) kilipata usajili wa muda na zoezi la
uhakiki wa wanachama linaendelea. Chama cha Movement for Democratic and Economic
Change kilifutwa baada ya kukosa sifa za kupata usajili wa kudumu.
2