FROM CHINAMWALI TO CHILANGIZO:

MWACHIDULE
Chimangiriro ichi chikufufuza mwadongosolo chilangizo m'mipingo ya Konveshoni ya
Babatist m'Malawi (BACOMA), ndikuona kufunikira kwache pakati pa mtundu wa
Achewa. Mu mbiri ya chiKhristu, zaonetsa kuti poyambirira mipingo imakana ndi
kutsutsana ndi miyambo ya makolo. Koma pang'ono ndi pang'ono, mipingo inayamba
kubvomereza ndi kulandira za miyamboyo pokhazikitsa mwambo wa chiKhristu
m'malo mwake. M'mipingo yathu ya Babatist, nkhani ya chilangizo ndi chinamwali
yakhala bvuto leni leni kutchito ya ubusa ndi yofalitsa Uthenga wa Yesu. Izi zakhala
tero chifukwa chakulephera kwa BACOMA kumvetsetsa ndi kutanthauzira chinamwali
kuchokera m'Mau a Mulungu muchinenero cha anthu.
Ndicholinga cha chimangiriro ichi kuthandiza BACOMA, komanso mipingo yonse mu
Afrika, kuti ikhale yomasuka kuphunzira za chikhalidwe ndi miyambo ya anthu.
Cholinga ndi kuti mipingo imvetsetse mozama ndikukhoza kutanthauzira mwambo uli
wonse pakugwiritsa ntchito Mau a Mulungu.a muchinenero chawo. Chimangirirochi ndi
chiyambi chakulimbikitsa BACOMA pandondomeko yakukambirana, kulingirira, ndi
kuphunzitsa anthu ake zokhuzana ndi chikhalidwe ndi miyambo ya makolo poyang'ana
matanthauzo ache m'Bukhu Lopatulika.
Chitatha chigawo chamayambo mu chimangirirochi, chigawo chachiwiri chayang'ana
mbiri, chikhalidwe, ndi zikhulupiriro za mtundu wa Achewa. Chigawo chachitatu
chaonetsa kukhazikitsidwa kwa mipingo wa Babatist kuchokera kumbali ziwiri.
Poyamba kuchokera ku moyo wachipembezo ndi chikhalidwe cha azungu aBabatist
akuAmerika, amene anabweretsa Uthenga Wabwino ku Afirika. Mbali yachiwiri
yayang'ana zinthu zingapo zimene zinapangisa aMalawi kulandira ndi kufalitsanso
Uthengawo kwa aMalawi anzawo. Popeza chilangizo ndi gawo la chikhalidwe chathu,
chigawo chachinayi chalongosola mwatsatane-tsatane mwambo wa chinamwali cha
Achewa cha ndakula. Chigawo chachisanu chapereka mbiri ya chilangizo makamaka
mu BACOMA. Chigawo chachisanu ndi chimodzi chalongosola ndi kufufuza m'mene
chilangizo chikuyendera m'mipingo ya Babatist. Kafukufuku waonetsa kuti chilangizo
sichikukwaniritsa zosowa zeni-zeni za anthu pakulingirira zolinga zimene chinamwali
chimakwaniritsa kwa Achewa. Chomwecho chigawo chotsiriza chapereka malingiriro
ndindomeko yofunika kuti BACOMA iyambe kukambirana, kulingirira, ndi kuphu­
nzitsa akhristu za m'mene Mau a Mulungu amatanthauzira miyambo yamakolo athu.
Chitsanzo cha chinamwali cha Chikhristu chaperekedwa potsirizira pa chimangirirochi.
IV