ritualeromanumtheroma nritual - Archbishop Lefebvre

Sacerdos superpelliceo ac stola alba indutus, dicat:
V. Adjutórium nostrum in nómine Dómini.
R. Qui fecit cælum et terram.
V. Dóminus vobíscum.
R. Et cum spíritu tuo.
Orémus. Oratio
Omnípotens et miséricors Deus, qui peccatóribus, pietátis tuæ misericórdiam quæréntibus, véniam et misericórdiam
tríbuis: orámus cleméntiam tuam; ut hanc corrígiam bene + dícere, et sancti + ficáre dignéris, ut omnis persóna, quæ
pro peccátis suis illa præcíncta fúerit, atque eam portáverit, gratam tibi continéntiam, mandatorúmque tuórum
obediéntiam servet, et intercedéntibus beáta María semper Vírgine, ac sanctis Augustíno et Mónica, véniam peccatórum
suórum obtíneat, et vitam consequátur ætérnam. Per Christum Dóminum nostrum. R. Amen.
Orémus. Oratio
Precámur te, Dómine sancte, Pater omnípotens, ætérne Deus: ut hanc corrígiam in signum puritátis bene + dícas, ad
restringéndos lumbos et renes, et voluntátem sub tua lege compriméndam; ut, quicúmque illam devotiónis stúdio
semper portáverit, et misericórdiam tuam imploráverit, véniam, et indulgéntiam tuæ sanctíssimæ misericórdiæ
consequátur. Per Christum Dóminum nostrum. R. Amen.
Et aspergatur aqua benedicta.
Deinde benedicitur corona.
Orémus. Oratio
Dómine Jesu Christe, qui discípulos tuos oráre docuísti: súscipe, quæsumus, bene + dicéndo oratiónes famulórum,
famularúmque tuárum; ut illórum orátio a te semper incípiat, et per te cœpta finiátur: Qui vivis et regnas in sæcula
sæculórum. R. Amen.
Et corona aspergatur aqua benedicta.
Postea benedicitur persona.
Orémus. Oratio
Pro uno vel una
Adésto, Dómine, supplicatiónibus nostris: ut hic fámulus tuus (hæc fámula tua), cui in tuo sanctíssimo nómine hanc
corrígiam impónimus, te largiénte semper devóte in sancta religióne persístat. Per Christum Dóminum nostrum. R.
Amen.
Orémus. Oratio
Pro pluribus
Adésto, Dómine, supplicatiónibus nostris: ut hi fámuli tui (hæ fámulæ tuæ) quibus in tuo sanctíssimo nómine hanc
corrígiam impónimus, te largiénte semper devóte in sancta religióne persístant. Per Christum Dóminum nostrum. R.
Amen.
Mox Sacerdos ipsam aspergat aqua benedicta.
Postea, eam cingens corrigia, dicat:
Accipe corrígiam super lumbos tuos: ut sint lumbi tui præcíncti, in signum temperántiæ et castitátis. In nómine Patris, et
Fílii, + et Spíritus Sancti. R. Amen.
Deinde Sacerdos dicat:
Dóminus qui cœpit in te (vobis) opus bonum, et ipse perfíciat: et augméntum grátiæ et glóriæ, méritis beátæ Maríæ
semper Vírginis, et sancti Augustíni, ejúsque devotíssimæ matris Mónicæ, tibi (vobis) concédat. R. Amen.
Et ego auctoritáte, qua fungor, indultóque Apostólico mihi commísso, te (vos) recípio atque accépto: et partícipem
(partícipes) ómnium bonórum, quæ fiunt per totum Ordinem sancti Augustíni, constítuo.