LITERESI BILENG AVANSE - boukie banane

TANSION SAP DAN KARAY, TOM DAN DIFE!
Nou tou kone ki nou pei Moris kouma Planet Ter zot dan dif e si nou pa gagn solision valab e rapid
pou ena enn trazedi pir ki 2 lager mondial siek dernie met ansam.
KRIZ ALIMANTER kapav vinn LAFAMINN dan boukou pei ki pa pran desizion ki bizen pou gagn
SEKIRITE ALIMANTER. Ena enn kouran lopinion ki panse ki Organism Zenetikman Modifie (OGM;
GMO) samem pou lakle ki pou ouver laport solision. Donk pou serten dimoun solision la li teknolozik.
Eski sa pozision la korek ousa li pli probab ki bon solision la li politik?
Bann ki opte pou solision teknolozik zot panse ki sistem ekonomik ki dominan li pa responsab dram
ki nou pe viv. Eski zot ena tor ou rezon?
OZM, parey kouma LENERZI NIKLEER PAR FISION, li ena bann retonbe negatif bien-bien danzere ki
aterm pou agrav sitiasion e menas lekzistans lavi lor later ankor plis. Anplis OZM vedir permet
MONSANTO chombo nou tou par lagorz.
Mo panse solision la li politik. Me eski nou ena kouraz politik neseser pou zet baz pou enn nouvo
kalite devlopman?
Ala ki dapre mwa bizen fer. Mo ti ekrir sa le 07.04.08.
"... Nou priyorite nasional bizen vinn SEKIRITE ALIMANTER (e pou ki nou reysi dan sa domenn la, nou
bizen konn itiliz nou resours prensipal: LATER.) Enn REFORM AGRER li endispansab si nou'le mobiliz
nou resours imen pou asir nou sirvi. Anmemtan bizen apiy for-for lor devlopman enn nouvo kiltir
alimanter ki repoz lor prensip "MANZ SEKI NOU PRODIR E PRODIR SEKI NOU MANZE". Ar enpe
limazinasion nou pou kapav envant nouvo reset ki servi pomdeter, may, maniok, batat, arouy ek
friyapen kouma nou nouritir debaz dan plas diri ek lafarinn enporte. Poudinn may, galet maniok,
katkat friyapen, jaket-poteto, chip etc. etc. pou oblize vinn 'bon-nana-normal'.
Pou reysi fer reform agrer, sekirite alimanter ek nouvo kiltir alimanter vinn enn sikse bizen enn lot
kalite ledikasion. Pou nou reysi mobiliz nou resours materyel ek imen, pou reksi kre bann laferm
entegre ek bann korperativ otozere, pou reysi liber limazinasion e kreativite nou bizen enn lot
program ledikasion ki repoz lor itilizasion nou LANG NASIONAL (Kreol Morisien) ansam ar Angle ki
bizen res nou LANG OFISIEL. Fer atansion! Pa met saret divan bef.
... Si nou'le reysi nou bizen konpran ki kiltir oral finn fer so lepok. So rol finn vinn segonder. Zordi
kiltir lekritir li endispansab pou nou devlopman. Akoz sa nou bizen LITERESI FONKSIONEL INIVERSEL e
sa li posib si nou adopte enn program bileng natirel Kreol Morisien/ Angle (toulede de lang Kreol).
Karant-an lendepandans pe dir nou sant enn lot sante. Nou zet baz pou kreasion enn nasion
progresis kot lazistis, partaz ek solidarite vinn baz nou kiltir nasional. Sekirite alimanter, demokrasi
anprofonder, devlopman dirab dan domenn materyel ek spiritiel pou sertennman garanti nou sirvi
lor enn planet ki bien malad... "
14.04.08
51