Gesellschaft für Pommersche Geschichte - Digitalisierte Bestände ...

Ein Jagdschein vom Jahre 1547.
Wir Barnim :c. bekennen und thun kunth meniglichen,
das wir auf underthenigs bitten und ansuchen des Erbarn
unsers lieben getrewen Matzke Borkenn zu Pansin gesessen, zu
seiner notdurfft jegenwertigen Zeiger und Schützen umb unser
Stadt Piritze auch durch den gantzen Waitzacker desselben orts
auf diesen ersten vnd schirsten Freuling vnd frühe Zeit, wan
das federwilprat wiederumb in diese Lande ankomen Wirt, beide
auf Eckern, wiesen vnnd anderswho dasselbe an kranichen,
Geusen, Enthen vnd andern federwilprath, wie solchs namen
hat, dis Ihar vnd diese frühe Zeit vber frey vnd vnbehindert
zu schiessen vnd zu fellen vorgunstet vnd nachgegeben haben.
Gestaten, Vorgunsten vnd nachgeben Ihme solchs hiemit krafft
dieses unsers Briefs, doch also, das er damit niemands gefherlichen
leibs oder lebens, auch anderen vngefherlichen Nachteil
vnd schaden am getreide, an den Eckern oder sonsten zufügen
solle; Unseren Amptleuthen, Voigten, Renthmeistern, Zollern,
Bürgermeistern, Richtern, Rathe vnd gemeinden, auch allen
anderen vnseren vnderthanen, ernstlich hiemit gebietende, Ir
diesen Zeiger hierinnen keinen eintragk, vorhinderunge vnd
beschwerunge beiegnen lasset oder selbst ertzeiget, sondern Ihnen
in solchem furhabendem wercke fortfharen lasset Bey vormeidunge
unser schweren straff vngenade. Vrkuntlich haben wir diesen
Brief mit vnserm Secret wissentlich besiegeln lassen, Der gegeben
ist Zu Alten Stettin Am Dinstage des 1. Februarii
Anno 3c. xlvij.^) v. B.
Staatsarchiv zu Stettin: Stett. Arch. ?. I. Tit. 83. Nr. 40.