KölnerLeben Dezember 2023 - Februar 2024

26
Vergnügliches
Dä Puut hät ene Name
E kölsch Verzällche vun Paula Hiertz
Drei Pütcher hatt der Klapperstorch allt bei de Nettekovens
hingerenein jebraat. Alles Weechter, ävver
noch keine Jung? Villeich dät et doch noch ens klappe.
Un richtich jedaach. De Mamm kräch widder ens
su ene komische decke Buch un domet kom endlich
ene Jung an. Der Papp hät vör luuter Alteration bal
ene Schlaach kräje.
Ein vun dä kleinere Weechter frochten: „Mama, wie
heisch dat Bröderche?“ Drop reef die Jroß, die dä
Klein am feukele wor un die Froch nit jehoot hatt:
„Dat es e Jüngelche!“ – „Och Jroß“, reef et Marieche
vun dä andere Deschsick, „dat es ene Chrestian!“
Drop der Papp laachsmungks zor Jroß: „Mamm, jevv
mer och ens dä kleine Chress!“ – „tian“.
En de nöhkste Johre leef vill Wasser der Rhing erav
un der Chrestian kom en de Schull. Dä Lährer hatt
die neu Schullpuute opjerofe un frochten jetz, wä nit
dobei jewäse wör. Drop reef der Chrestian laut: „Ich,
Herr Lährer!“ – Aber ich habe doch Christian Nettekoven
aufgerufen.“ Drop dä Klein widder: „Herr
Lährer, dat ben ich nit. Ich ben der Jüngel Nettekoven!“
– „Und wie wirst du zuhause gerufen?“ –
„Herr Lährer, ming Jroß hört och allt ens nit jot, dann
däut die sich ihr Hörjeräte en de Ohre un kritt domet
dat Jüngel-Höre en der Jreff.“
Wie singe Johrjang 21 un domet jroßjöhrich wood,
stundt et ehschte Klassetreffe an. Der Chrestian
frochten singen Baas: „Hadder kein Loss metzokumme?“
Dobei lovvten hä sing fröhere Schullkamerade
en de hühkste Tön. Un hä es metjejange. Wie der
Chrestian met singem Baas die Saaldör opmaat, do
reefen allemolde wie us einem Mungk: „Do kütt der
Jüngel!“ Un et Katrin, wat immer hinger im her wor,
worf noch ene Satz noh: „Enä, dat es et Jüngelche!“
Wie schienerlich. Singe Baas saat nor noch laachend:
„Jung, maach der nix drus. Ich ben derheim bes hück
och immer noch et „Karlemännche“, un et wood en
ärch schön Klassetreffe!
Illustrationen: Freepik
Anzeige
KölnerLeben Heft 6 | 23