KölnerLeben Dezember/Januar 2022/23

24
Vergnügliches
Oh du fröhliche ...?!
E kölsch Verzällche vom Toni Buhz
En einem vun dä Veedele zo Kölle hat sich der Bürgerverein
jet Besonders enfalle loße. En der Adventszick
sollt ne Chressbaum vörm Altenheim opjestallt weede.
Enjeweiht weede sollt dä Baum am eehschte Adventssonndach
un dä Bezirksbürgermeister sollt bei ner
kleinen Fier et Kommando zom Aanzünde der Kääze
jevve. Ne Frauenchor sollt singe, zwei Trötemänner
blose un nen Här sollt kölsche Rümcher vördrage. Su
kom der 1. Adventssonndach eran. Vill Lück wore jekumme.
De Kääze am Baum kunnt mer met nem Schalter
aan- un usknipse. Doför wor der Hein us dem Altenheim
zoständig. Wann hä dat Woot „Kääze“ hoot,
sollt hä aanschalte.
Wie der Bürgermeister aankom, jingk et los. Die Trötemänner
spillten „Oh Tannenbaum . Der Vörsitzende
dät de Lück bejröße un sat, hä wööd sich freue, wenn
der Herr Bürgermeister späder die Kääze aanzünde
dät. Der Hein hat „Kääze“ jehoot un de Beleuchtung
aanjeschaltet. „Zo fröh!“, heeß et un et woodt düster.
Dä Rümchesmächer sollt si Jedeech vördrage. Hä fing
aan: „Hell dun de Kääze brenne.“ Hein hat hinjehoot
Anzeige
un, wupp, woren de Kääze widder
aan. „Zo fröh“, heeß et un et wood
widder düster. „Jetzt singk der
Frauenchor, eh der Herr Bürgermeister
die Kerzen anzündet“ sat
der Vorsteher. Wat jetz kom, künnt
ehr üch denke. Die Frauen wore polnische
Helferinne us dem Altenheim, kannten nor ein
Leed en ehrer Sproch.
Alsu spillten die Bläser, uußer der Reih, widder: „Oh
Tannenbaum“ un et fing aan zo rähne. Die Gedeechte
op Kölsch woodte jestreche. Dä Deechter reef verärjert:
„Dann maat öhr Kääze allein aan.“ Kääze aan,
Kääze us. Der Hein wor et leid un dät sich verdröcke.
Der Bürgermeister woodt no met dä Worte: „Wir
stehen hier am Tannenbaum“ bejröß. Dat hooten die
Bläser un widder däten se „Oh Tannenbaum“ blose.
Weil et stärker aanfing zo rähne, reef der Bürgermeister:
„Ihr Kerzen erstrahlet“, ävver et dät sich nix, dä
Hein, zoständig för de Beleuchtung, hatt sich jo durch
de Koot jemaat. Drop dät einer us dem Verein sämpliche
Schalter ömläje, et wood dachhell, nor de Kääze
jingken nit aan. No fing et aan zo schödde. Alles sokten
e drüch Plätzche. Dat wor et dann.
Ov dä Verein em nöchste Johr widder ne Baum opstelle
weed, ich jläuv et ieher nit.
Illustration: Freepik
KölnerLeben Heft 6 | 22