Was däichsch…

Was däichsch…
Gedichtli vor Silvia Tschanz

Inhaltsverzeichnis
Was däichsch? ······························ 4
Säg nid ’s isch fertig ·························· 6
Herbschtstüürm ····························· 8
Ds grüene Riich ···························· 10
Bsundri Ougeblicke ························· 12
Üsi Fründschaft ···························· 14
Dis Lachä ································· 16
Dr Hüslischnägg ···························· 18
Üser Händ ································ 20
We Krokusse blüeie ························· 22
Wie mängisch scho ························· 24
Mi chlini, grossi Wäut ······················· 26
Hesch grad ä Momänt? ······················· 28
Nimm dir Zyt ······························ 30
Paar Tritte gägä obs ·························· 32
Äs Kunschtwärk ···························· 34
Dr Winter git nid uf ························· 36
Mängisch lohnt sechs ······················· 38
Di letschti Sunneblueme ····················· 40
Aus isch vrgänglech ························· 42
Wes z’erscht Mau schneit ····················· 44
Dr Märliwald ······························ 46
Fröid ar Herbschtzyt ························· 48
Gömer zämä z’Bärg ························· 50
Äs Wiehnachtet ···························· 52

Mängisch lohnt sechs
Mängisch lohnt sechs z’kämpfe,
sech z’wehre für-n-e Sach,
de git me sech us guetem Grund,
symbolisch eis uf d’s Dach...
Hiuft vielech a-me Schwache,
wo’s ganz allei nid schafft,
gemeinsam chunnt me wyter,
vrdopplet Muet u Chraft...
Vielech preichts eim säuber –
suecht Grächtigkeit im Läbe,
de wär für d’Zuekunft z’kämpfe
o richtig, aber äbe...
S chunnt vor das d’s klare Luege
eim nümm’ cha müglech si,
Es Gfüehl isch da u laht nümm na:
«Die ganz’ Wält isch gäg mi!»
De flüge plötzlech Steine
u richte Schade a,
wiu me nid cha nah gäh
und eifach Rächt wett ha...
Doch Steine chöi o schön si,
statt Schmärz viel Fröid bereite,
drum söu dä Stei i Härzform,
dr Zuekunftswäg begleite...
38

Dis Lachä
Dis Lache macht us jedem Tag,
wo näblig isch u grau,
e früsche, klare Morge
und d’Sunne schint uf d’s Mau...
Es fröhlechs Gsicht im Räge
u d’Wulche löst sech uf,
was söll’s scho we-n-ig nass bi,
ig gibe da nüt druf...
e liebe Blick us Ouge,
wo d’Wält so fründlech gschoue,
verschüücht was eim laht zwyfle
und schäicht drfür Vrtroue...
16

Säg nid ’s isch fertig
Säg bitte nid: «’s isch fertig! Das isch es jtze gsi..!»
Was söu i de o mache? Alleini – ohni di?
Mir hei doch so viel Schöns gha, e gueti Zyt vrbrunge,
hesch du de all’s vrgässe? Was üs zwöi het vrbunge?
Ig weiss, me seit: «Was gärn hesch, söu’sch du nid wöue bha,
d’s Glück laht sech nid la fessle, drum söu me d’s Liebschte lah...»
Dä Mönsch wo das het gschribe, gseht haut nid i mis Härz,
weiss dä äch, wie das wehtuet? Dä gruusam Trennigsschmärz?
Doch ig bi starch, das weiss ig – u d’s Letscht im Spruch steit o,
we d’s Glück nid luegsch z’erzwinge, wird’s ume zue d’r cho...
6

Aus isch vrgänglech
Ds Läbe isch vrgänglech –
was cho isch, mues o gah...
das gspüri geng ganz dütlech,
we-n-ig e Mohn gseh stah...
Chuum lüchte d’ Blüetebletter
ganz rot ir Summersunne,
längt grad e gäihe Luftstoss –
u d’Schönheit isch vrrunne...
All Sinne richtig bruuche,
vo ganzem Härz – erläbe...
vo jedr Stund wo chunnt u geit,
d’s Beschte für mi z’bhäbe...
Irgendeis wirds Zyt si,
d’s letscht Wägli hei zue z’gah,
de wett-i chönne säge,
ha gueti Tage gha...
Wett drum probiere z’gniesse
u d’s Schöne würklech z’gseh,
sig das es winzigs Blüemli,
der Sunneglanz im Schnee...
42