Die Christkindlsingerin mit Deckblatt 1

Maximilian Schmidt Die Christkindlsingerin
Hie und da kommt dös Zwergl ans Tageslicht ’raus, wärmt si an der Sonn’ und schaut
neugieri ins Thal awi. Da hat’s amal drei Lamperln springa sehgn und a Deanerl singa g’hört.
Denkt si dös Zwergl, möcht do’ wissen, wer so schön singt und hat si’ zum Deanerl
hing’schlichen, – und wie er ’s g’sehgn hat, hat sei’ alt’s Herzl laut zu schlag’n ang’fanga und
er hat si niederg’setzt und lang und lang hin- und herwärts g’sonna. Wie wär’s, hat er si denkt,
wenn i dös liebe Deanerl drinna hätt’ in mein’ Bergl; da hätt’ i do’ an’ Ansprach und an’
Unterhaltung und ’s waar nimmer gar so langweili, wie ’s mir gar oft so schmerzli wird. Da
hat er si putzt und g’waschen, hat d’ Taschen voll Edelstoa g’steckt und is zum Deanerl
hinganga. Z’erst hat er ihr a paar Komplimenter g’macht und hat si dabei so possierli
ang’stellt, daß ’s Deanerl grad ’naus hat lacha müass’n. Wie er aber mit a Hand voll Edelstoa
aufg’wart hat, hat si ’s Deanerl gar nimmer verkennt vor lauter Freud über die blitzenden
Stoan.
„Im Anfang is ihr dös Zwergl freili a weng grauli vorkomma, aber nach und nach is ’s ganz
vertrauli mit eam worn und hat mit eam g’spielt, als wär’s a Kamerad von ihr. Dös haben ’s
den Sommer und Hirgst über trieb’n. Wie aber der Winter kommen is, hat’s ’s Zwergerl
nimmer heraußen aushalt’n kinna, weil’s eam z’kalt worn is, und darum hat er zum Deanerl
g’sagt, es möcht eini kommen in sein’ Bergl, da hätt er a prächtigs Haus, wo ’s trauli und
warm is, und Gold und Alabaster und Edelstoa könnt’s hab’n grad gnua. Dös Deanerl is richti
eini in den prächtigen Bau und hat si nöt satt sehn könna an all die schöna, winzigen Sachen,
an dem Gold und Edelg’stoa, dös ihr’s Zwergerl alles g’schenkt hat. „Nimm alles,“ hat er
g’sagt, „was d’ siehgst, und spiel’ und tandl’, so lang d’ willst.“ Und ’s Deanerl spielt und
tandelt, vergißt si ganz und gar – und drüber san zehn Jahr voganga, grad wie r a
wunderschöner Traum. Da fallt dem Deanerl amal a Lilienkranz von Alabaster aus der Hand
und bricht mit an’ hell’n Schlag auf ’n Pflaster z’samm. ’s Zwergl und ’s Deanerl san drüber
erschrocken und aufg’fahren, als wär’n ’s plötzli aus ’m Schlaf erweckt worn. ’s Zwergerl
war no’ kloa’ und schmächti, dös is in den zehn Jahren a schöne, holde Jungfrau worn mit
langen, goldenen Locken und an’ wunderliablichen G’sicht und war so groß, daß ’s wie r a
Riesin dem Zwergerl geg’nüber g’stand’n is. Und dös Zimmerl und die Gangerln waren jetzt
für sie z’ nieder und z’ schmal. Sie wollt’ naus aus dem Bergl, aber es is nimmer ganga. Da
hallt ihr schmerzlich’s Jammern durch’s kloa’ Haus, es is ihr gwen, als ob’s lebendi begrab’n
wär. D’ Stoa’ hätt’n si drüber erbarmen mög’n, wie ’s in ihrer Verzweiflung Tag und Nacht
um Hilf g’ruafen hat, aber es war nöt z’ helfen. ’s Zwergerl is wie verstoanert in an’ Eck
g’stand’n, hat g’woant und d’ Handerln g’runga, denn er wußt’ si nöt z’ raten, bis endli der
Tod die arme Jungfrau von ihrer schrecklin Not befreit hat. Da hat ihr ’s Zwergerl an’
korallen’ Sarg mit an’ Krystalldeckel g’macht und ringsum verziert mit Gold und kostbare
Stoaner. Neb’n dem Sarg sitzt er und woant, und seine Zähren rinna drauf in endlosem
Jammer, denn an’ solchen Zwergerl kann sei’ Herz niermals brech’n. So lang d’ Welt steht,
muaß er woana und trauern, und seine viel’n Zähren rinna als zwoa Brünnerl außa aus dem
Bergl, wo sei’ Haus is. Die Brünnerln, die eiskalt und krystallern ’rausquellen, san ringsum
eing’faßt mit Veigerln und Vergißmeinnicht. Sie murmeln so wehmüati im Schatten über
glänzende Kieseln dahin, und jedem, der d’raus trinkt, wird’s weh und woanerli z’ Mut,
weil’s aus dem Bergl kommen, wo dös arme Zwergerl ewi woant um sei’ Riesendeanerl. –
Dös is dös Märl von die zwoa Brünnerln auf der Rusel,“ schloß Waberl. „I hon die Brünnerln
g’sehn und hon d’raus trunken und hon bitterli woana müass’n über dös Schicksal von dem
arma Deanerl und über den ewigen Jammer von dem unglückli’n Zwergerl.“
Lautlose Stille herrschte in der Stube, da schon während Waberls herziger Erzählung die
Spinnräder zum Stehen gebracht wurden, um alles besser zu vernehmen, und in Gedanken
beschäftigten sich jetzt alle mit dem Zwergerl und der Riesin, mit den Edelsteinen, dem Gold
und dem Alabaster.
Die alte Nandl hatte sich eben ein neues Märchen ausgesonnen, das sie zum Besten geben
wollte, als an die Stubenthür geklopft wurde.
12