Kerwezeitung 2007 - Kerweborsch vun de Tornhall

Schiri Schiri auf auf Umwegen
Umwegen
Wenn ma on en Schiri denkt
Der fuffzisch Joar schun Spiele lenkt,
Donn fällt oam nur oan Noome oi:
Des konn nur de Hoinz Osterod soi.
Bei alle werd er gern uffgenumme,
Nur noch Hoh, do derf er net meh kumme.
Dort kreegt er sofort ins Gesicht gegriffe
So hott er die mol umgepiffe.
Doch die Crumschder Olde Herrn,
Howwe all ihrn Schiri gern.
Wenn die so uff ihr Fahrte brumme
Werd de Hoinz gern mitgenumme.
Aach dääs Joahr woars mol wirrer soweit,
Noch loange vor de Kerwezeit.
Do sinn die Kerl noch Oberstdorf gedüst,
Un honn sich e bissje es Läwe versüßt.
Zum Woandern gings in die hohe Berge,
Wie`s Schneewittche mit de 7 Zwerge.
Doch goanz so brav woarn die do net,
Sunst wärn se heit net in moine Redd!
Denn ich hobb geheert, die olde Beck,
Schlucke ferschderlich wos weg!
Un aach dääs Joahr im Allgäu gings wirrer mol rund
Des wurd em Hoinz uff oamol zu bunt.
Er hott on soi Gesundheit gedocht,
Un sich alloa uff de Hoamwäg gemocht.
Doch irgendwie war er so verwirrt,
Un hott sich bitterbees verirrt.
Doags zuvor, mit ocht, neu Bierscher im Bauch,
Kannt´ er jeden Boam un jeden Strauch.
Doch fast noch nüchtern woar ihm alles fremd.
Soi Herz rutscht longsoam schun ins Hemd.
Er hott sich gequeelt un er hott sich geschunne,
Awwer ums Verrecke soi Pension net gefunne.
Un es beste Detail, ihr macht eich ins Hemd:
Ei der Kerl hott koan oanzische Noame gekennt!
Er konnt die Pension, in der die onnern längst penne
Oafach net beim Noame nenne!