s'Dorfgspröch - in Märstetten - mitten im Thurgau!

wil immer, wenn mer use gönd,
dur üsri Spure Weg entstönd.
Wievill chliini Eigeheite
präged doch au üsen Wäg.
Und s gitt sovill Möglechkeite,
dass mer au i üsne Täg
wenn’s deför gad Zitt isch, kritisch
und wenn’s sii mue, au politisch
ohni grössers Ach und Weh
öppis chöned underneh.
Sit üsri alte Eidgenosse
uf em Rütli gschwore händ.
hät me so vill Neus scho bschlosse
und die Bschlüss, die fülled Bänd:
Gebot, Verbot und Paragraphe.
Wie bald ächt bruuched ali brave
Grosseltre allefalls s Patent
wenn’s d Enkelgöfli hüete wend?
Vo hütt aa spielts en grosse Rugel,
dass jedes Schuelchind richtig schriibt.
Wie isch daa mit em Uusdruck Gugel,
wo amm nöd blos a d Holzgant triibt,
sondern sich im Internet
e hööchi Stellig gsichret hät?
Vo meer uüs chönds aalls Englisch schriibe,
blos müesst e Waldfescht Waldfescht bliibe
Ich denk an Wirbel um die Näme
vo allne Flure a de Thur:
Doo tütsched Dütsch und Hochdütsch zäme
wäg däre Nyffenegger-Kur.
Mer gsiend, die Flurbereinigung
im Sommerloch bringt mengs in Schwung
und d Leserschaft, die freut sich würkli
am Bluescht vo allne suure Gürkli.
Im nöchste Monet scho gitts Wahle
und drum au bald e grosses Gschiss.
Wer taar als Bundesroot denn strahle
und wer wird zäh Tag spööter Miss?
Bi Federers sinds jetzt au z vierte.
Mer wüsseds us de Illustrierte,
wo klar bestimmt, wer i de Schar
vo Promis promeniere taar.
Mer chönnt no vill Gedanke spinne,
doch warted uf üüs Fiir und Füür,
e Ziit zum Feschte und zum Bsine,
viellicht sogär en Obetür.
Ich ha n Eu wöle zeige, neime
chann sich au Uugreimts mengmoll reime.
Drinine liit e Uufgebot.
Iiverstande? Bhüet is Gott!
Ottoberg, am 1. August 2009
Hans Ruedi Fischer (fis)
17