Die Geschichte einer Albgemeinde.(ohne Bilder) - Bernstadt

Doch au en Korb zom Sattler naus da send mr öfter na,
ond wenns was kleins zom Näha war, gfrogt ob ma druff warte ka.
Nau hats au no 3 Schreiner ghet, dia hant des war a Pracht,
so manches neue Möbelstück von Hand damals no gmacht.
ond isch amol am Kuchastuhl dr Fuß öfter rausganga,
nau send mir halt zom Beinasaschreiner oder zom Baurschreiner ganga.
Au wenn amol beim Ball spiela a Fensterscheib hat kracht,
da send mr schnell zom Bücklesschreiner, der hats glei wieder gmacht.
Dr Walter-Maurer ond dr Walter-Zimmerma send en dr Platzgass gwea,
mir waret fast nebadra, dia hammer oft au gsea
Wia se am Morga en dr Früha idr Handwerkszeug hant glada,
s’glei Sach uff en zwoirädriga Karra nauf, Grüschtstang uff en Waga.
A Weißputzer hats sich damals au em Flecka eifrig grührt,
der hat seine Pinsel, Kell ond Oimer no mit em Schubkarra gführt.
Dr Zementer duß em Korb hat Semsa ond Grabstoi gmacht,
ond Plättla glegt en manchem Bad, des war a wahre Pracht.
Wenn os amaul am Wäddigschuh hand Nägel ond Eisele gfehlt,
na semmer zum Schuhans na ond hants zom macha nagstellt.
S’hat ja em Fecka ganz vertoilt meih Schumacher no ghet,
dr Stängleschumacher, dr Ilgaschumacher, dr Öhlerschumacher, dr Bauer-
schumacher ond dr obre Förschner, i glaub jetzt hau i alle zählt.
Dr Sailer hat vor viele Jahr no selber Soiler dreht,
ond wo heit osra Salzhall statt, hat der sei Werkstatt ghet
.
Beim Häfner en der Platzgasse dronta hat ma no Häfa und Plättla brennt,
von deane ma beim Stoiklauba no oft an Scherba fend.
Am Morga en dr Herrgottsfrüh, da isch dr Holzwart komma,
ond hat mit seim Gaulfuhrwerk d’Milchkanta end Molke mitgnomma
.
Ond hat amol an einer Stell a volla Milchkann gfehlt,
na hatr laut dau vor em Haus mit seiner Goisl knellt.
Dr Kohlastrobl der hat einst au Ellawara ond Kohla verkauft,
ond wenn ma an graußa Gatta hat ghet, hat man zum Baumputza braucht
.
Wenn Kender hant a Fahrrad kriegt ond hat bald ebbes kracht,
isch ma halt zom Eisele ganga, der hats oim wieder gmacht
Fünf Wirtschafte hammer einstens ghet, ds Bierhaus ganz vornadra,
da war so manche Hochzeit einst do denkt no mancher dra.
Ond jahrelang hat au em Ort dr Bierwirt Post ond Paket austrage,
net mit em Postauto wia jetzt, sondern gloffa ond mit em Handwaga.
Ond au dr alte Löwewirt hat no a Ämtle ghet,
der war dr Büttl jahrelang ond au drEscheu em Feld
Em Adler hammer oft als Kender am Sonntag nach em Essa
en Moschtkrug Faßbier dürfa holla, des hammr nia vergessa.
En Hasa semmer selta komma, drfür zom Lammwirt oft,
da hammer a guats Veper kauft ond aufan Wurstzipfel ghofft.
116