12007 - Bissen

Klautjen 5| 2007 −
Hecken a Beem verschéineren
de „grousse Mies“
Eis Industriezon hëlt ëmmer méi konkret
Formen un. Déi éischt Betriber hunn hir
Aktivitéit opgeholl, an et ass nach just
eng Fro vun der Zäit, bis och déi lescht
fräi Plaze bebaut sinn. Gebaier stinn elo
do, wou soss Kéi op de Wise getrëppelt
sinn. Och d’Spazéiergäng duerch d’Wisen
an d’Felder vu ‘Klengbousbierg’,wéi mer
se kannt hunn, gehéieren der Vergaangenheet
un.
Fir een effektive Sichtschutz ze garantéieren,
mä och fir e Stéck Natur mat Spazéierweeër
zwëschent Industrie- a Wunnzon ze erhalen,
huet d’Ëmweltkommissioun an Zesummenaarbecht
mat dem Naturschutzsyndikat
SICONA e flotte Projet ausgeschafft, deen am
Fréijoer zum Deel schonn ëmgesat gouf.
Voller Freed a mat ganz vill Begeeschterung hunn
d’Kanner aus dem 3. a 4. Schouljoer sech mat
hire Jofferen a Schoulmeeschtere während zwéin
halwer Deeg un der Hecken- a Bamplanzaktioun
„Op dem grousse Mies“ bedeelegt. Ronn 1 300
Heckeplanzen a bal honnert Beem mat hire Péil
goufen an de Buedem gesat, a Mulch ronderëm
getässelt. D’Planzaktioun, déi ronn 15 000 Euro
kascht huet, gëtt zur Halschent vun der Gemeng a
vum Ëmweltministère bezuelt.
Nieft den Hecken a Beem entsteet ausserdem eng
arteräich Blummen- a Kraiderwis, an sou entwéckelt
sech hei lues a lues en neien, wäertvolle Liewensraum
fir d’Planzen- an Déierewelt. E Spazéierwee
féiert d’Foussgänger duerch dës Gringzon an erlaabt
et, d’Natur méi no z’erliewen oder einfach op enger
vun de Sëtzgeleeënheeten ze raschten.
R.S./M.M.