VERNUER – GFEIS – MAGDFELD

1 / 2012 VERSCHIEDENES Blattl für Riffian und Kuens 39
„Tag der Senioren”
„Tog der Senioren“, steaht afn Prospekt,
„Tog der Begegnung“, als lohnendes Projekt.
Do steaht die Tona gonz erstaunt davor
und frog: „Wos stellt denn des do dor“
„Tog der Begegnung“, wos isch denn sell
und im Vorbeigian sog i schnell:
„Loss di überroschen, des werd a Fescht
mit an Haufen Leit und bsundre Gäscht.
Spater les i genau den Zettel an der Wond
sieg, de Begegnung gibt’s jo im gonzn Lond!
Der 1. Oktober war dafir auserkorn,
a gonzer Tog, lei fir insere Senioren!
Wer des wohl wieder ausgekopft hot
Sicher a poor Hearn, draußen in der Stodt.
An Tog a aufgsetztes Lochen
a poor Spiele kannt man mochn.
Uans hot man direkt erfundn fir heit
es hondelt von der „guatn oltn Zeit“.
Händeschütteln, a poor g‘schwollene Wort‘
im Hinterkopf schun in an ondern Ort.
Und liaber als unsicher ummerworten
nemmens holt a Packtl Kortn,
und opfern von ihrer kostborn Zeit
a bissl fir die ormen, oltn Leit.
So isch der Tog der Begegnung in oller Munde
jede Zeitung bringt die frohe Kunde
der Londeshauptmonn und sein Stab,
sich gerne die Ehre gab.
Überoll frohe, lochende Mienen
bedonken sich herzlichst bei ihnen.
Fir den schianen gelungenen Sunntig,
wohlwissend: morgen isch wieder Muntig…
Und 364 Tog kemman af ins zua
do hobmer von de Hearrn sicher a Ruah.
Ins olln zum Trost und zur Freid
gibt’s bei ins do etliche Leit,
de uanmol die Woch den Weg zu ins suachn
und ins freiwillig und gern b’suachn.
Do steaht koane Kamera bereit
do geaht’s lei um die Leit.
Dovon steaht nix in dr Zeitung drinnen,
von inseren freiwilligen Helfern und Helferinnen.
Do gibt’s nix zum Profitieren,
trotzdem tiat’s enk aktiv engagieren.
Spazieren giahn, Spieln, a Hilf beim Essen
s’Religiöse und s’Basteln werd a nit vergessn.
Ins isch’s a Freid und a a Bitt‘
mocht weiterhin so fleißig mit.
Do isch die Anna, de a insern Pflonzn
ihre Aufmerksomkeit schenkt,
ohne dir war wohl schun manchs Büschele verwelkt.
Und die ondere Anna, die Mesnerin,
isch gern in der Kapelle drin.
Schaug a, dass der Pforrer s’rechte Gwondt unleg,
und dass die Kirch sauber isch und a gepfleg.
Kimmp die Erna, die Gretl,
die Annemarie oder die Fine,
erstrohlt so manche ernste Miene.
Weil nor werd gebastelt, g’spielt oder gekortet,
hot man jo a gonze Woch drauf g’wortet.
Die Monika isch sehr sensibl,
bringt uns nahe den Text aus der Bibl. (Gotteslob)
Und mit so manch‘ besinnlicher Andacht,
hot sie ins in Glabn näher gebrocht.
Dr Karl, dr Paul, die Anna, die Monika und die Beate
bringen von Herzen gern
jedn Sunntig ins Oltersheim den Leib des Herrn.
Die Helga verpasst jedem den perfekten Haarschnitt
hoffentlich bleibt sie no recht long so g’schickt und a fit.
In der Kuch, in Gortn, im Speisesool tian
a poor sich befleißn,
de kearn long no nit zum oltn Eisn.
Fir die Orbeit im Haus und draußn
tian sie sich interessiern
und oft die letztn Reserven mobilisiern.
Dr Willi besorgt in oller Stille,
für jeds Wehwehchen die richtige Pille.
Bringt Tropfen, Cremlen, Tabletten schochtelweis,
gegen Schmerzen, Arthrose und – Verschleiß.
Ob mir des Zuig no brauchn frog i mi.
Hobmr decht seit kurzn a nuie Therapie.
Denn kemmen dr Hans und die Ingrid Ocker,
reißts ins vor Begeisterung foscht vom Hocker.
Do bleibt kein Auge trockn
aus olle Bettn tians die Leitlen auserlockn.
Olle, de i hon vergessn, de möchtn’s
bitte mit Fassung trogn.
Weil a zu denen tian mir „Vergelt’s Gott“ sogn.
Und wenn lei i eppes vergiss,
Gottes Lohn isch enk gewiss.
Marlene
Wir gedenken unserer Verstorbenen
Martin Laimer (86),
gest. 12.12.2011
Herr, nimm ihn auf und gib ihm
Wohnung und Heimat bei dir!