Faschingspredigt von H. Raum am 5. Februar 2012 in St. Helena

Faschingspredigt zu Jeremia 9,22-23
Hans Raum, gehalten am 05.02.2012 in St. Helena zu Großengsee
Der Friede des Herrn sei mit euch allen, Amen.
Grüß Gott, ihr Leid aus nah und fern dou in der Dellija Gma.
Ka Angst, ich will ka Pforrer wern und kann a kanner sa.
Mir überlieng schou lang im Kirngvurstand und wolln des a benenner.
Wou dro des ligt, dass fast ka Leid mer in die Kirng rei genger.
Vielleicht ligts dro, des kennt fei sa, drum kummer immer wenger,
dass die mastn vo die pforrersleit blous hochdeitsch riedn kenner.
So hammer gsacht, ist an der Zeit, dou mou amal wos passiern,
a Mundortpredicht, dij mou her, des wollmer ausprobiern.
Dij Fosnatszeit wer dou ganz recht, dou nei passt des ganz gwies.
Mir plaudern über Gottes Wort, wij uns da Schnobl gwachsn is.
Da Dialekt gibt Heimatgfühl, drum plaudern mir den gern.
Vielleicht ka daudurch a die Kirng für manch'n mehr zur Heimat wern?
Vielleicht sen a - zwa - drei derbei, dij wou mich nit verstenner,
doch hoffentli dijn dij nit glei dou as da Kirng naus renner.
Für jene, die mich nicht verstehen, mach ich's natürlich gern,
danach, gleich nach dem Gottesdienst, dies hochdeutsch zu erklären.
Denn wij ihr wisst, in derer Gma willkommen ist dou a jeder,
es sind auch ein paar Preussen da, die versteht auch nicht gleich ein jeder.
Es ko doch kanner wos derfür, des is a wunderschij,
a jeder hout sei Muddersprouch, mir sollt a dazou stiej.
Der liebe Gott kennt jede Sprouch und kennt a alle Leid.
Ihn brachst du a nix falsch derziehln, der was nemli Bescheid.
In unnerm schijna Gotteshaus dou iss doch Platz für jedn.
Und alle solln zum Gotteslob miitsinger und miit bet'n.
Des Predichtwurt fürn hejdin Dooch, des'd in der Bibel lesn kannst,
des stejt ba Jeremia 9, Versch zwarerzwanzg und dreierzwanzg.
Die Geschichte über das Rühmen auf hochdeutsch schon gehört,
und af fränkisch gsagt, gejtz übers AOGEM.
Der Herr im Himmel sacht zu uns:
Wennst gscheid bist, dou damit nit prahln, wennst Kraft houst, gib nit oh,
wennst reich bist, hau niht aftn Putz - nou bist viel besser drou.
Den da gscheidst ist der, der über des den Herrn im Himmel stellt
ihn lobt dafür und zu ihm stehjt, des is es, wos ihm gfällt.
Der will doch blous Barmherzigkeit und Recht für alle Leid,
den Friedn auf da ganz'n Welt und a Gerechtigkeit.
Mir wolln ganz kurz des Biblwurt nu amol überdenk'n,
und unnern Sinn ganz a'fach blous af unnern Herrgott lenk'n.
Amen
1

Es gibt halt Leid, dij gem gern aoh und sen ganz furchtbar gscheid.
Sie mana, sie ham immer recht dij, dij dihn an fast scho leid.
Weil wennst dann frägst, wijs in ihrm Leb'n zu unnern Herrgott stenner,
Dou dijns ganz weit weg afamol, als obs nan gor nit kenner.
Dij sen am mastens glei omdras, wenns vo da Kirng was hörn
Sie leb'n ihr Leben, wijs innern passt und loun sie a nit störn.
Dann fangers a zum Debattiern - den Glaum, dij Kirng ganz sicherlich
Des ganze Zeich, des mou nit sa, ich glab blous des, des wou ich siech.
Nauch dem Spruch wast, wijs um dij steht, vo Gscheidheit keine Spur.
Sie lebn in ihrer eigner Welt, dou kummt ka Heiland vur.
Ba die mast'n gehjt des a lang gout und alles lafft wij gschmierd.
Doch dij Dooch, dij bleim nit aus im Leb'n, wous um an dunkl wird.
Dann gibt's a dij mit ganz viel Kraft und blägn wij nit gscheid
ganz ohne Gfühl und mit Gewalt nu drangsalierns die Leid.
Dou hast's - die Ellerbung ganz naus, wal dennern gehjts blous drum,
wer dou im Wech stehjt, der hout Pech, dij renner alles um.
Da Volksmund sacht, des werd ihr kenner, des sen dij, dij über Leich' n genger.
Blous wenn ihr Kraft amol vergejt, dann zbrech'ns gar oft dra,
denn nix ist dou af derer Welt, wos dann nu halten ka.
Es gibt an Spruch aus alter Zeit, der des ganz deldll sacht,
und dannouch sollt sie jeder richt'n, a wenn er Fehler macht:
Sei gecher Unrecht af da Welt und mout des a kann zou
des wos da selber a nit gfällt, wenns mit dir a annerer dout.
Und nou viel Reiche, lijbe Gma, dij sejing blous nu ihr Geld.
Und wissen nit, wos wirkli ziehlt af derer schijner Welt.
Mit Dollarzeich'n in die Aung genies'n dij ihr Leb'm
Und denkn mastens gornit dro, dass die Armer a wos gem.
Doch ans is klor, trotz viel viel Geld - wirts an manch'n überraschn
Mir mijn alles douloun af da Welt, weil as letzte Hem, des hout ka Taschn.
Doch dou drieber urteiln derf ma nit, des, des liegt uns wirkli fern.
Denn des macht der, ders besser waas, des überloama unnern Herrn.
Des is des schijne doch an ihm, bei ihm senn alle gleich.
Er nemmt an jed'n, wij er is, egal ob orm ob reich.
Der Herr gibt uns a haffn Zeit und wos mach'n mir dou draus?
Mir renner, schuftn wij nit gscheid, uns gehjt die Luft ball aus.
Doch mir dijn weiter, nemmer mit, was ma am Weg so find.
Mir stelln fast alles afn Kupf, doch es fehlt halt wos am End.
Jeder soucht nach am erfülltn Leb'n, doch vergessmer oft dabei
Den Herrn und Schöpfer derer Welt - es kennt su afach sei.
2

A' ganzer Stund in anner Woch'n will er für sich blous hom
Doch uns is su viel wichtiger alls wij der Herr dou drom.
Schaud eich dij neie pforri oh, dij strotzt blous su vor Leb'n
Und sie is immer für eich dou und will eich Gottes Seg'n gem.
Und des, des dout bestimmt nit wej, im Gengteil, sugor gout.
Dou wird ma innerlich zufried'n und des vertreibt su manche Wout.
Bestimmt will's kanner in der Gma, doch wenns su weider gehjt,
kos sa, dass in unnerer schijner Kirng, die Pforri allans dau stehjt.
Grod ijtza, wou sie gfunner hout a neies Messnerpaar.
Drei Madla führ'n dou ijtz des Haus, des ist doch wunderbar.
Nehmt eich a Herz, denkt drieber nouch. AStund hout jeder Zeit.
Dij Rouh dout gout und ihr dijt wos für eiere Seligkeit.
A Ausried, dij woust efter heijerst - ich brach ka Kirng derzu! I
ch hou mei stilles Kämmerlein, dou drin hou ich mei Rou.
Doch in der Kammern, lijbe Leid, dou ist blous Grembl drin.
Zum betn gejt dou kanner nei, des kummt gor kann in Sinn.
A annerer sacht, in der Natur dout er sein Herrgott spürn
Doch singer, beten - mitanander - douts besser funktioniern.
Wij des im Leb'n schou ganz oft wor, wird vieles gor nit gschätzt.
Doch wenns dann wech ist, denk ma oft, wennst des blous widder hättst.
A grous Problem ihr leijbn Leid is a da Nachwuchs heid.
Dij junger Leid im Dauerstress ham für die Kirng ka Zeit.
Es loun si ganz viel konfermiern. Doch is des Fest vorbei,
dij mastn siehst dou inner nimmer, ganz seltn amol zwa - drei.
Mir Ältern mijst'n dou vielleicht a wenig a Vurbild sa
Und mejer selber dazou dou für a lebendige Gma.
Wos nitzt denn des, wenn ich nix dou, doch die junger ständig bitt
Und dann kummt mastens nu der Spruch: Dij Niegl häjern einfach nit.
Af unner Jugend mijn mir schauer und dij soll'n des a wirkli spürn,
sie sen von Herzn dou willkummer, mir woll'n kann Anzich'n verliern.
Dij Dooch um Lijchtmers, des bedeit, die Weihnachszeit is rum.
Und mancher freid si wij nit gscheid af des, wos ijtzer kummt.
Wij jeder waß, ihr lijbe Gma, s'ls widder Faschingszeit
Fa Alters her für viele Leid a Grund zur Fröhlichkeit.
Da Winter dauert nimmer lang, die dunkel Zeit is vorbei.
Es kündigt sich des Frijor oh, ma fühlt si richti frei.
In derer Zeit, dou hout ma's gern und tout si kostümiern.
Verkleidn, das die kanner kennt, des muama ausprobiern.
Und dann für a paar Stund im Johr amal spieln an annere Rolln
Dou is bestimmt nix schlechts derbei, mer mou des halt blous wolln.
Wenn jeder dou sei Grenz'n kennt, derf ma mit reiner Gwissn
Am Anfang vo an jed'n Johr die tolle Narrenzeit genießn.
3

Doch jeder soll für sich entscheidn, wijers am besten macht.
Wer zwider is, der ist halt su und wer lachn will, der lacht.
Der Herr im Himml hout uns a die Freid und's Lach'n gem.
Des Feiern und die Gselligkeit ghert a dazou zum Leb'n.
A den Humor, ihr lIeijbn Leid, den soll ma nitt verliern
Su manches wird a bissl leichter, ma mous blous ausprobiern.
Mir ham uns denkt, mir wolln amal dou in der Kirng wos mach'n
Denn wer sacht, dass verbod'n is, dou inner a mal zu lach'n.
Der liebe Gott, der wird's versteih, dass mir heijt dou am Ort,
a bissl af a annere Ohrt, verkündigen sei Wurt
Zusammenfassend möcht ich song, denkt an den Predichttext.
Denn da Gscheidst und a da Reichst is wirkli der, der si af unnern Herrn verlässt.
Und wij ihr wisst, hout alles doch im Leb'n seij eigne Zeit.
Die Freid, des Leid, die schijner Doch und a die Traurichkeit.
Heijt mach ma uns an schijna Doch im Gmahaus drijm in Gseij
Und lodn dou die ganz'n Leid zum Weisswurschtessen , ei
Su wij ich dou in dij Rund'n schau, ganz unscheniert,
ich glab, dij Eiladung hout si rentiert.
Schij, dass a suviel kummer sen, ma siecht, die Leit wern dou.
Su könnts doch aller Sunndoch sa, die Frau Pforrer und da Kirngvurstand,
ach Gott, wern mir dou frou.
Ganz kurz nu zu dij Kirngvurständ, weil grod der Nama fällt,
mir bittn drum, dass dou im Hirbst doch a a jeder wählt.
Und dass si fir des Ehrenamt a Leid bereit erklärn,
dij mit viel Freid und Leidenschaft sich in dem Dienst bewährn.
Ich bet für unner Kirchergma und wünsch des allerbest.
Das unner Herr im Himml drom die Kirng bestehen lässt.
Amen.
4