Versli als Pdf downloaden - Samichlaus Volketswil

Alter 8 Jahre und älter (auch geeignet falls ein älteres Gschwüschterti nur noch
'mitmacht', weil der Samichlaus-Besuch für ein kleiners Kind bestimmt ist)
Am Waldrand stoht es Hüüsli,
versteckt und ganz elei,
ame verträumte Plältzli,
wer isch ächt do dihei?
En Maa mit wiissem, langem Bart
stoht im verschneite Garte,
es gseht fascht us, als ob er würd
det uss uf öpper warte.
Scho raschlets zwüsche Büsch und Äscht,
wer chönti das wohl si?
D Tierli sind’s vom Tannewald,
si chömed gschwind verbi.
„Willkomme i mim chliine Riich!“
rüeft de alti Maa.
„D Fuettergschirli hani gfüllt,
es söll für jedes ha.“
S’jüngschte vo de Hasechind
nimmt er uf sin Arm,
es loht sis Fell lo strichle
und fühlt sich wohl und warm.
Do chunt es Rehli z’humple,
s’isch gstolpered bim Stei,
und zeiget ächli truurig
d’Schürfwunde a sim Bei.
Es Füchsli hät sich au veletzt
und jömmelet ganz grüüsli,
doch allne wird do ghulfe
i dem vertraute Hüüsli.
Hätt de Maa en Mantel um
us rotem, schwärem Tuech,
treiti er en Hirtestab
und es grosses Buech.
So wüssti, s’isch de Samichlaus,
wo i dem Hüüsli wohnt,
de Samichlaus, wo jedes Jahr,

die liebe Chind belohnt.
*
Es Hüüsli stoht im Tannewald,
zmitzt im verschneite Gländ,
nur Tierli chömed dra verbi,
wenn’s öppis z’Frässe wänd.
De liebi gueti Samichlaus
füllt jede Tag ufs neu
s’Fuetterchrippli hinde us
mit feinem, frischem Heu.
Sin Esel, d’reh und d’Hirsche
frässed gern devo
und was derbi uf d’Erde fallt
das isch für d’Häsli do.
Hütt muess de Chlaus pressiere,
es bliibt ihm nümm viel Zyt,
de Wäg ist Städtli zu de Chind
isch sträng und zimli wiit.
Drum leit er warmi Stiefel a
und chnöpft sin Mantel zue.
„Chum Gräueli“, seid er, „mir zwei
händ hütt no wacker z’tue.“
*
Es tunklet scho im Tannewald
und schneielet ganz lisli.
Was ist das für es Liechtli det
i säbem chline Hüsli?
Da isch de Samichlaus dehei
mit sine guete Sache!
Er hät scho s Lämpeli azündt
und tuet grad s Kafi mache.
Da pöpperlets am Lädeli,
und s Glöggli ghört er lüte!
Jetz weiss er scho, wer dusse isch
und was das sell bedüte:
s Christchindli chunt na zabig spat,

es wirt en welle stupfe,
er mües de Sack bald füre neh
und sini Finke lupfe!
s Christchindli seit:
«Herr Samichlaus,
e schöni Ornig händ er!
De Chlaustag staht ja vor der Tür
händ Ihr dänn kein Kaländer?
s brucht Wiehnachtsbäum i jedes Hus,
für vili hundert Chinde
ihr müends im Wald na haue hüt,
de Vollmond sell Eu zünde!»
De Samichlaus stellt d Tasse ab.
«Nu nid so gsprängt, Christchindli
die Bäumli müend gwüss bsorget si,
das hät na Ziit es Stündli.
Ich möcht jetz ämel na in Rueh
Min z Abig fertig chäue
und wenn es Tässli gfellig wär,
so würds mi herzli freue!»
S Christchindli lachet: «Nu so dänn,
da bini nüd dergäge;
e bitzli öppis Warms tuet guet
uf mine wite Wäge!
Me cha ja dänn na allerlei
abrede und usmache,
was jedes Chind sell übercho
vo dene schöne Sache.»
Si sitzed gmüetli binenand
im chline Stübli hine.
De Vollmond zündt d Laterne a
und lueget heimli ine.
Er loset lang am Fänsterli
und uf der Hustürschwelle
wänn er nu besser schwätze chönnt,
er müesst mers gwüss verzelle.