Kerwezeitung 2009 - Kerweverein Mauer

2009
MAUERMER KERWEBLATT
JUBILÄUMSAUSGABE
HERAUSGEBER: 1. KERWEVEREIN MAUER E.V. PREIS: 2,50 €
Jahre Mauermer Kerweumzug

Es begrießt eich eiern Kerwepfarrer
De Kerwepfarrer sescht „Hallo“,
ihr seid jo a mol widder do.
Zu meine Predischt des isch sche,
es g´hört sich a Sunndags in die Kerch zu geh.
60 Johr gibt´s den Verei,
60 Johr lade mir ei.
60 Johr die bledschde Sache,
60 Johr schun schene Warre.
60 Johr en gude Haufe,
60 Johr un es geht net nur ums saufe.
60 Johr fa die mir uns bedonke wolle,
60 Johr die in Erinnerung bleiwe solle.
Nur 60 Sticklin hab ich heit net,
doch jetzt zu unsre Kerwered.

Werbung
Herrmann
Werbung
Volksbank

Der ermordete Reiher
So monscher hot sei Hobby,
devu hondelt jetzt die Gschicht.
un zwar geht´s do um oner,
der halt gern Forelle zischt.
Wie´s halt so isch mit Tiere,
ihr wisst ihr liewe Leit.
Für so eh Verontwortung,
braucht ma halt a Zeit.
Zeit hot der jo jede Menge,
die er ins Hobby investiert.
Und er kennt sich sehr gut aus,
er hot jo long genug studiert.
Ihr seht also ihr liewe Leit,
er konn des gut mit dene Fisch,
doch ones Dags do fällt ihm uff,
das was im Becke onerscht isch.
Do fehle Fisch des konn net sei,
do konn was net stimme.
Wie soll en Fisch denn iwer Nacht,
denn ofach so verschwinne?
En Reiher sieht er uff seim Grundstick,
den er sofort verdäschdigt.
Des isch o ah beim Fischreiher,
durchaus ah bereschdigt.
Sofort rüschdet der Maumer uff
un schützt sei Zischterbecke.
Mit em Netz des driwer liegt,
will er de Reschd noch rette.
Doch des liewe Federvieh,
kummt wieder zu seim Vesper.
Der Vogel war wohl ah wie er,
im 30. Semester.
Des allzu schlaue Federvieh,
muss er mit onere Mittel schlare.
Er beginnt um sei Forelle,
Geschütze uff zu fahre.
Ringsrum alles zu gebaut
un noch emol e Netz.
Doch er hot den Fischdieb,
schun wieder unerschätzt.
Dem zeig ich´s denkt er sich,
denn sei Idee die isch fantastisch.
Em Lade do besorgt er sich,
en Fischreiher aus Plastisch.
Doch net nur des zur Abschreckung,
ihr Leit un des isch wohr,
nimmt er tatsächlich en Pinsel
und streicht den Vogel blutrot o.
Denn umgebrochte Vogel,
legt er so newer´s Becke.
Vielleicht hilft jo jetzt des,
den Fischdieb abzuschrecke?
Un wirklich hot des Plastischvieh,
den Fischbestond gerettet.
Dass so was ah noch klappt,
do hätt ich niemols druff gewettet.
Vielleicht hot er jo Ängscht ghabt,
oder er war satt?
Wahrscheinlich hot der schlaue Vogel,
awer doch nur mitleid ghabt.

Doktorred
De Dokda Scholz gibt eich en Tipp,
zur Vorbeugung der Schweinegripp.
Die Osteckungsgfahr isch zwar gering,
weil en Kerwe meischt nur Rindviecher sin.
Trotzdem ihr Leit schittelt net jedi Hond,
wenn ihr a oner kennt e Kopfnicke longt.
Basst ma uf wege H1N1,
wen ihr e oners Glas nehmt donn bitte net meins.
Zu guter letzt uf´m WC,
immer scheh die Händ Wäsche geh.
Donn nadierlich gonz viel trinke,
donn dut der Virus glei verschwinde.
So konn eich gar nix me bassiere,
so dut ihr eich net infiziere.
Bleibt mir iwer Kerwe gsund,
für Massepanik gibt´s kon Grund.
Ich bin doch do wenn´s wirklich brennt,
der Dr. Scholz den jeder kennt.
Doch Sprechstund isch net vor de Elfe,
vorher muss ich ma selwer helfe.
Mir sehe uns eich noch viel Spass,
denkt dro des zahlt ko Kronkekass.

Bürgermeischterred
De Dick de Olivje dut eich begrieße,
es isch widder Kerwe un des du ma begieße.
Die im Rothaus die schmeisse ma naus,
des hält ma doch longsom nimmi aus.
Nur noch Urne im Rothaussaal,
sind do so viel gstorwe des isch doch net normal?
Nur noch Wahle un Stimme zähle,
awer en Dick den braucht man et wähle.
Ich nehm des Ruder ofach in die Hond,
der Jögl der hot abgedonkt.
Un so werd´s iwer Kerwe lafe,
do sin jetzt mei Paragraphe.
§ 1: Wer fa e Wohnmobil en Carport baut,
soll erscht mol gucke wie viel Platz so was braucht.
§ 2: Hüpfburgen bei Hallenparty´s sin fa Kinner, net um
Kinner zu machen.
§ 3: Die Gleise Richtung Meckse sin wohl aus Mauer,
denn fa die Meckser sin sie zu hoch.
§ 4: Bahnhofzoo WWF isch unerwegs
un befreit sämtliche Ziege in Streichelzoo´s.
§ 5: Uf SPD Party´s werd geschmuggelt bis de Zoll kummt.
§ 6: Dem Haushalt vun Meckse fehle 300 000 Euro, bitte de
Hut rum gehen losse.
§ 7: Bitte alde Waschbecke un Klos net uf de Stroße die grad
umgebaut were entsorge.
§ 8: Autos iwer Kerwe stehe losse in de Garasch, wenn ma
sisch net einisch isch ob rei oder naus.
§ 9: Wer mim Löschfahrzeig onere nass mache will, sollt
erscht mol gucke ob Wasser im 1000 l Tonk isch.
§ 10: Liewer Moos uf´m Dach als im Rothaus drin.
So des sollt fa heit mol longe,
jetzt werd uf die Kerwe gonge.
Des Kerwezelt isch fa eich offe,
ab geht´s nei mol oner gsoffe.
Ihr werd sehe bei uns isch´s widder scheh,
viel Spaß wüscht eich de Dick de Olivje.

Werbung
Dick
Werbung
Stützle-Müller

Ko Eis om Gleis
Ach wie werd der Bohof sche,
bald gibt´s do a e Eiscafe.
Uff de oner Seit do gibt’s Praline
un des alles glei newer de Schiene.
Des hot sich a de Jörg gedenkt,
sei Fahrrad Richtung Bohof g´lenkt.
Um noch em Reschte mol zu seh,
wie isch doch bloß sei Gmeinde sche.
Doch ons do drausse gfällt ihm net,
do baut doch oner grad e Trepp?
Er sescht weil´s liegt ihm uff de Zung,
„ Do fehlt die Baugenehmischung“.
Zu diskutiere hot kon Zweck,
der Jörgl sescht die Trepp muss weg.
„ Is awer Beton schon bestellt“
Was unserm Jörgl gar net gfällt.
Beim Italiener awer gilt e Wort,
er setzt den Treppebau doch fort.
Der Jörgl hält sei Wort halt a,
die Trepp musst weg un des war klar.
So fängt ma o em Cafe newer de Gleise,
den Bau halt widder abzureise.
Inzwische isch eh Stahltrepp dro,
scheh ischs wore wirklisch wohr.
Doch uff isch leider dort noch net,
trotz der schene neie Trepp.
Was hot der Jörgl a so stur sei messe,
mir kennte heit schun e Eis dort esse.

Pesch beim Tschech
Monsche Leit die hewe Glick,
mit dene freit ma sich donn mit.
Um denn wu es jetzt geht der hot´s net,
deshalb für ihn eh Kerwered.
In de Urlaub ging´s in die Tschechei,
sei Fra und eh oners Pärle ware a debei.
Mit dem Auto isch ma g´fahre,
um sich die deier Bohn zu spare.
Glei am erste Dag war des Auto em Arsch,
hänge gebliwe in de Diefgarasch.
In de Garasch vum Hotel an so em blede Eck,
jeden Dag fährt er do net.
Mehr gibt’s do donn ah net zu sare,
also musst ma U-Bohn fahre.
Do konn em Auto nix bassiere,
un ma muss net selwer rumkutschiere.
In de U-Bohn drin nur freundliche Leit,
die losse dich durch in de heitisch Zeit.
Lady´s First zuerst die Fraue,
doch ma sollt halt niemond traue.
Unseren Maumer steigt als letzschder aus,
em Arsch guckt de halwe Geldbeitl raus.
Des hewe die freundlische Männer gsehe,
un konnte nimmi widderstehe.
Die Dier geht uff un er geht naus,
de Geldbeitl zieht ma ihm schnell raus.
Die Dier geht zu was soll ma sare,
de Geldbeitl isch weiter g´fahre.

Was e Elend alles drin,
Trost zuspreche mescht kon Sinn.
Perso, Führerchein und die Kart der TSG,
der Verluscht der dut schun weh.
Alles melde, sperre isch net ohne,
außerdem braucht ma noch Krone.
Doch die Wechselstube hewe zu,
do sescht oner „Wechsele du?“
Er denkt sich den Kerl schickt jetzt de Himmel,
en gscheite Kurs hot der net iwel.
Er wechselt viel Geld ohne richtig zu zähle,
der Kerl war in Ordnung wird schun nix fehle?
Die hälft ware Krone ja des stimmt,
awer die oner Scheine ware Forint.
Des war en deiere Urlaub in de Tschechei,
dabei soll es dort so billisch sei?
So e Pech des derfsch niemond sare,
wie er dehom war hewe sim noch alle Leidunge ogegrawe.
Un die Moral vun dere Gschicht,
Leo trau de Tscheche nicht!

Umzug Impressionen
aus vergangenen
Jahren

Werbung
Stadler
Werbung
Reifen Lenz

Schiffschaukel
Vun unsre Elsenzschiffer gibt´s was neis,
und zwar isch des bassiert in oner Schleis.
En Engläner war vorher dro,
fuhr in de Schleis net richtig vor.
Des war halt widder very Britisch,
und unser Boot stond nimmi mittisch.
In de Schleis lässt ma des Wasser ab,
uff omol hot ma Schlagseit g´habt.
Gonz laut nur noch en Hilfeschrei,
„ Mir fliege glei ins Wasser nei“.
Blitzschnell hot oner reagiert,
dass bloß de Flasche nix bassiert.
De gute Tropfe schnell umklommert,
damit denoch a koner jommert.
Im Fall wonn ma des iwerlebt,
un halt des Schiff net unner geht.
Immer schräger wurd des Schiff,
un koner hot gwisst was des jetzt isch.
De oh mescht en gekonnte Sprung,
un fängt die Markskleslin die wu dopse rum.
Jeder versucht mit dem Eisatz vun seim Lewe,
sich on irgendwas schnell fescht zu hewe.
Des Schiff dut immer weiter Kippe,
des Schiffkoch hot sichs Boh uffgschnitte.
Sticht er des näxte mol in See,
konn der als Käpt´n Ahab geh.
Uffomol war der Spuck vorbei,
in die Schleis lief widder Wasser nei.
So rettet ma die Elsenzcrew,
ma konnt jo selwer nix dezu.
Die Engläner die ware schuld,
oder vielleicht next mol e bissl mener geduld.

Werbung
Stadler
Werbung
Reifen Lenz

Schlumplklau
Wenn oner unser Schlumpl klaut,
wenn sich des oner wirklisch traut.
Wenn er donn denkt das nix bassiert,
wenn er sich so verspekuliert.
Wenn er donn aus de Wertschaft geht,
wenn sei Auto dann uff Holzbleck steht.
Wenn er sich net elo ins Rothaus traut,
wenn er dezu en Beistond braucht.
Wenn er kummt mim Erich Mick,
wenn donn isch des e Kerwestick.
Wenn er im Museum verzieht sei Miene,
wenn die Radschrauwe sin in de Urzeitvitrine.
Wenn oner des vun sich behaupte konn,
wenn donn de Hartmut Zimmermonn.

Werbung
Webung Stadler

In de Fahrstuhl „Gugge“!
Omol im Johr, do isch es der Fall,
do treffe sich so paar verickte, bei uns in Mauer in de Hall.
Verkleidet gschminkt, Ihr Leit was für e Schau,
des nenne die donn Guckemusisch un mache viel Radau.
Mit viel Kostüm und noch mehr Pfunde,
isch es oft net leicht.
bis man den owere Teil, vun unsere schene Hall erreicht.
Als Hilfsmittel bei Jedermonn, do isch was sehr beliebt.
Do fährst ma donn halt nuff, weil es en Laschteufzug gibt.
So ah do beim Guggetreffe, do war des dieses Johr.
do nahme paar de Ufzug, des kummt jo a mol vor.
Oner, zwe vun mir aus drei, konn des Ding noch packe,
awer doch ko sechse, die hewe doch en Macke?
Zu sechst mit ihre Guckeronze, drigge die sich doch do nei.
Oner schwerer wie de onere, wie konn denn so was sei.
Luft ohalte, Bauch eiziehe un schun ging es los.
Die Fahrstuhldier ging grad so zu, die Erleichterung war groß.
En korze Ruck un nix me ging, nadierlich blieb ma stecke.
Bei de sechs Dicke Atemnot, ma muss sie gonz schnell rette.
Die Konservefahrer innedrin, die schnappte schun noch Luft,
wie gut das ma do drauße, schun die Feierwehr oruft.
Die sin donn a glei ogerickt, mit Ehrgeiz halt wie immer.
Lauter als die Guggemusisch, mo mont es wär viel schlimmer.
Doch die Kerl ware glei do, de Dufter vorne naus.
Die holte unsren 6er Presssack, aus dem Laschteufzug raus.
Für 6 Personen zugelost, maximal 400 Kilo un net mehr.
6 Personen über 700 kg, waren do halt viel zu schwer.
Doch mit dem Lese hot ma´s net, die kenne bstimmt ko Note.
also Leit des nexte mol, isch de Fahrstuhl halt verbote.

Herrmann
Wir möchten uns bei allen
Spendern und Gönnern des
1.Kerweverein Mauer e.V.
für das gelingen des dies-
jährigen Kerweumzuges
recht herzlicht bedanken!

Zum Schluss
Des war´s ol widder liewe Leit,
isch hab genug gebabbelt heit.
Sche war awer dass ihr seid all kumme,
hot uns die Wertschaftkries a mitgenumme.
So moncher hot schun abgewrackt,
bei de Angie wieder´s Kreiz gemacht.
A geht es nach Südafrika,
was immer kummt und was a war.
Losst eich die Laune net verderwe,
denkt dro mir sin uff de Kerwe.
Un stellt a bloß widder was o,
isch les es donn a next Johr vor.

Werbung
Sparkasse