Gem Brief 201101.pub - kreuzkirche.co.za

Die groot stories-boek; tydlose vertellings oor lewenswaardes
en die waarde van die lewe. Lux Verbi-BM, 2008.
“Vertel vir my ‘n storie…” – hoe dikwels het ons self as
kinders so gevra, of word nou deur ons kinders gevra! Hierdie
wonderlike boek is vol stories, veral vir grootmense,
maar ook vir klein mense, want hulle leer ons van die lewe,
van dit wat belangrik en blywend is.
Die verhale is alfabeties volgens onderwerpe gerangskik,
met ‘n meer omvattende indeks van temas agterin die
boek.
Een storie wat ‘n besondere indruk op my gemaak het is
getiteld: ‘Die invloed van ‘n hoflike gebaar’. Dit vertel van
‘n klein gebeurtenis in die laat 1940’s in Johannesburg. ‘n
Jong swart seun en sy ma loop op ‘n smal sypaadjie, toe ‘n
lang wit man van voor af by hulle verbykom. Omdat die sypaadjie
nou was, draai die man uit sodat hulle kan verbykom
en lig sy hoed om hulle vriendelik te groet. Die
swart seun was oorstelp deur hierdie hoflike gebaar en vra
sy ma: “Hoekom doen hy dit, Mamma?” “Ek dink dit is omdat
hy ‘n Godsman is, my kind … hy is ‘n Anglikaanse
priester in Sophiatown en Orlando.” “Dan wil ek ook, as ek
klaar met skool is, ‘n priester en ‘n Godsman word.”
Die wit man was eerwaarde Trevor Huddleston – die swart
seun was die latere aartsbiskop Desmond Tutu.
So kan ‘n klein bietjie vriendelikheid onmeetbare gevolge
hê!
Iemand het eenmaal gesê: “Die kortste afstand tussen ‘n
mensekind en die waarheid is ‘n storie.”
Elke lewe is ‘n storie en het ‘n storie – ons kan so baie van
mekaar leer deur ons stories te deel, soos dit in hierdie
boek gedoen word.
15
IB